DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba kazu Jogu Online Scamming Call Centre iha Fomento II, deside aplika medida Prizaun Preventiva ba arguidu nain ida.
Arguidu sira submete mai iha Tribunal hamutuk 27, no husi Ministeriu Publiku neebe reprezenta husi Prokurador domingos Gouveia Leite promove sira ho krime Jogu Ilisitu, previstu iha artigu 322, Asosiasaun Kriminoza previstu iha artigu 188, Brankamentus Kapitais previstu iha artigu 313 no Burla Informatika previstu iha artigu 268 husi Kodigu Penal Timor Leste nian.
Rona tiha arguidu sira, iha despaisu Tribunal nian liu husi Juiz estajiada, deside aplika medida rua ba arguidu nain 26, mak hanesan medida kausaun kada arguidu ho osan US$ 4000, hanesan garantia ida ba Tribunal atu arguidu sira labele halai ses husi Timor, se sira halai ses mak osan nee sei afavor ba Estadu. Tribunal mos aplika medida Proibisaun Auzensia ba arguidu nain 26 atu sita sira nia pasaporte hodi labele sai husi Timor.
Ba arguidu nain ida ho inisial LJ, Tribunal aplika medida Prizaun Preventiva.
“Arguidu nain 26 hetan medida kausaun kada arguidu US$ 4000 no medida Proibisaun Auzensia, iha arguidu nain ida mak hetan medida Prizaun Preventiva,” dehan Advogadu Januario Martins ba STL iha Dili, Domingu (19/07/2026).
Antes nee, iha alegasaun Ministeriu Publiku husu Tribunal atu aplika medida kausaun kada arguidu US$ 5000 no medida Proibisaun Auzensia.
Enkuantu husi parte defeza nian konsidera katak, kausaun nee boot liu, husu Tribunal atu aplika kausaun US$ 2500 ka US$ 3000 ba kada arguidu.
Prosesu nee prezide husi Juiz estajiada nain ida, Ministeriu Publiku reprezenta husi Prokurador Domingos Gouveia Leite, arguidu sira hetan asistensia legal husi Advogadu Privadu, Januario Martins, Octavio Cardozo no Pedro Camoes.
Rekorda katak, arguidu sira nee Polisia Sientifika Investigasaun Kriminal (PSIK) detein iha loron 14/07/2026, iha Fomento II, tanba deskonfia pratika aktu Jogu Online Scamming Call Centre.
(ter)
