DILI, STLTIMORLESTE.com – Kazu atividade Scamming Call Centre Ulmera, Tribunal hatun ona despaisu prolonga tan loron 10 atu arguidu nain 76 depozita kausaun neebe iha ba Tribunal.
“Sira hateten katak agora daudaun nee sira iha difikuldade kontaktu ho sira nia familia atu apoiu finanseira depozita ba iha osan kausaun nian nee, hau husu tan prolongasaun tempu 10 dias ba Tribunal, no Tribunal Admite ona. Horiseik hori bainrua mos hau fo hatene ona ba sira, atu fo hatene malu hodi depozita osan kausaun nee dentru loron 10 nia laran, se liu loron 10 nia laran mak la depozita osan nee Tribunal bele avalia fila fali,” dehan Defensor Publiku, Henrique Mariz ba STL iha Dili, Domingu (09/08/2026).
Nia esplika, Tribunal aseita fo tan prazu loron 10 ba sira atu depozita osan kausaun nee. Iha momentu primeiru interogatoriu iha arguidu nain 76, no iha arguidu nain 75 nia parte mak fo asistensia ba.
Hatan konaba deskonfia arguidu balu halai ses husi teritoriu Timor, hanesan defeza la iha konhesimentu konaba ida nee.
Nia dehan, momentu iha prosesu primeiru interogatoriu kuandu despaisu Tribunal nian sai, defeza esplika ona ba sira konaba medida neebe Tribunal fo sai, tanba nee sira iha obrigasasaun tenke kumpri, se sira la kumpri Tribunal bele halo alterasaun ba medida neebe iha antes ona ba fali medida seluk.
Nia informa, Tribunal prolonga ona, tanba nee sira tenke depozita osan nee, se sira la depozita ida nee problema sira nian laos defeza nian.
Rekorda katak, Tribunal Judisial Primeira Instansia Dili (TJPID) iha loron Kinta (16/07/2026), liu husi despaisu ba prosesu primeiru interogatoriu deside aplika medida ba arguidu nain 76 neebe kaer iha Ulmera, Munisipiu Liquiça.
Iha despaisu Tribunal nian deside aplika medida Aprezentasaun Periodika (AP) atu aprezenta aan iha Eskuadra Polisia neebe hela besik ba fulan ida dala rua, no medida kausaun ba arguidu ho inisal D ho kausaun 10 mil, no ba arguidu nain 75 ho medida kausaun $ 2500 kada arguidu, no kontinua mantein ho medida Termo Indentidade Rezidensia (TIR) neebe antes nee iha ona.
Tribunal mos fo prazu loron 10 ba arguidu sira hodi depozita kausaun neebe iha ba Tribunal, se la depozita Tribunal sei halo alterasaun husi medida kausaun ba fali iha medida Prizaun Preventiva.
Prosesu nee lori mai iha Tribunal.ho numeru NUC. 0248/26.PNSIK. No Ministeriu Publiku halo promosaun ba arguidu nain 76 ho krime haat (4) mak hanesan Krime Jogu ilisitu, Asosiasaun Kriminoza, Burla informatika no krime Brankamentu kapitais, tanba deskonfia envolve iha atividade Scamming Call Centre.
Iha alegasaun Ministeriu Publiku reprezenta Prokurador, Domingos Gouveia solisita ba Tribunal atu aplika medida koasaun Aprezentasaun Periodika, medida Proibisaun Auzensia no medida Kausaun ho osan US$ 10 mill ba arguidu D nuudar manager ba atividade Scamming Call Centre, no arguidu nain 75 Ministeriu Publiku husu Tribunal atu aplika medida prestasaun Kausaun ho osan US$ 5 mill.
Enkuantu parte Defeza nian husu Tribunal atu aplika medida koasaun Aprezentasaun Periodika, medida Proibisaun Auzensia.no medida Kausaun ho osan menus husi US$ 5 mill bazeia ba sira nia kondisaun ekonomika, tanba sira nee foin too mai Timor,
Arguidu sira nee Polisia Nasional Timor Leste liu husi Diresaun Servisu Investigasaun Kriminal (DSIK) hamutuk ho Diresaun Servisu Informasaun Polisia (DSIP) iha Polisia Nasional Timor Leste (PNTL), detein sidadaun estranjeiru hamutuk nain 76 ho flagarante delitu.
Ekipa mos prende sira nia pasaporte iha area Ulmera, Munisipiu Liquiça, nee hamutuk pasaporte 76, telemovel no osan balun.
Prosesu Primeiru Interogatoriu nee prezide husi Juiz turnu, José Maria, Ministeriu Publiku reprezenta husi Prokurador Domingos Gouveia, arguidu nain 76 hetan asistensia legal husi Defensor Publiku Henrique Mariz no Advogadu Privadu, Eusebio Xavier.
(ter)






