KAK Kontrola Uza Sala Kareta Estadu

Kareta Estadu (Foto: Espesial)

DÍLI, STLTIMORLESTE.com – Komisaun Anti-Korrupsaun (KAK) sei hametin kontrolu ba utilizasaun kareta Estadu atu prevene funsionáriu públiku sira uza patrimóniu Estadu ba interese pesoál.

Komisáriu KAK, Rui Pereira dos Santos afirma katak, operasaun kontrolu ne’e nu’udar parte husi esforsu instituisaun nian atu asegura utilizasaun patrimóniu Estadu tuir finalidade servisu públiku.

Nia hatete katak, kareta Estadu tenke uza ba atividade ofisiál, la’ós ba nesesidade pesoál ka família, hanesan lori oan ba eskola.

“Karreta Estadu ne’e patrimóniu Estadu nian, tenke uza tuir finalidade servisu públiku, la’ós ba interese pesoál,” Rui dehan ba jornalista sira iha Ministériu Finansas, Ai-Tarak Laran, Kuarta (18/11).

Rui esplika katak, utilizasaun kareta Estadu iha loron Sábadu no Domingu bele permite bainhira iha nesesidade servisu ofisiál. Maibé, utilizasaun ba atividade privadu kontinua proibidu.

Nia apela ba lideransa no funsionáriu públiku sira atu hatudu ezemplu di’ak iha utilizasaun rekursu Estadu, liuliu sira ne’ebé simu ona subsídiu transporte.

Tuir Rui, funsionáriu sira bele uza kareta privadu, motór ka táxi bainhira presiza lori membru família, inklui oan, ba eskola.

“Lideransa tenke sai ezemplu ba funsionáriu sira. Se simu subsídiu transporte, bele uza transporte privadu ka táxi atu lori oan ba eskola,” nia afirma.

Rui hateten katak, KAK bele prosesa lalais kazu utilizasaun sala kareta Estadu, tanba investigadór sira bele identifika motorista, pasajeiru no finalidade utilizasaun kareta nian.

Nia esplika katak, kazu pekulatu no pekulatu uzu bele lori ba prosesu sumáriu, tuir dispozisaun legál ne’ebé aplika.

Maibé, kazu krime ne’ebé iha ameasa pena prizaun to’o tinan lima bele presiza tempu investigasaun naruk liu, tanba presiza rekolla dokumentu, evidénsia no testemuña.

“Kazu kareta, ita identifika motorista, sé mak lori, sé mak iha laran no ba asuntu saida. Ne’e prosesu lalais,” Rui dehan.

Komisáriu KAK ne’e mós informa katak, instituisaun ne’e antes ne’e detein ona funsionáriu na’in-neen relasiona ho kazu utilizasaun sala kareta Estadu, fulan rua ka tolu liubá.

Nia enfatiza katak, asaun KAK la’ós arbitrária, maibé hala’o tuir lei atu proteje patrimóniu Estadu husi utilizasaun ne’ebé la tuir finalidade públika.

Iha fatin ketak, akademiku Universidade Nasionál Timor Lorosa’e (UNTL), Rafael de Jesus, defende katak KAK tenke kontinua hala’o kontrolu ho rigor ba funsionáriu públiku sira ne’ebé utiliza kareta Estadu la tuir finalidade.

Nia konsidera katak, fiskalizasaun rigorozu importante atu prevene abuzu patrimóniu públiku no asegura funsionáriu sira kumpre regra utilizasaun rekursu Estadu.

(ter)

Share it :

Leave a Reply

Your email address will not be published. Required fields are marked *