DILI, STLTIMORLESTE.com – Membru Komisaun Rekrutamentu no Selesaun ba Juízes Supremu Tribunál Justisa (STJ) no Tribunál Rekursu, Carmelita Caetano Moniz informa katak, kandidata ida ba vaga STJ rezigna hosi prosesu konkursu, tanba kondisaun saúde la permite nia kontinua halo teste eskrita.
Carmelita hateten katak, iha 18 Setembru, kandidata na’in-33 tama ba sala ezame iha Sentru Formasaun Jurídika no Judisiária atu tuir teste eskrita. Maibé, depois ezame lao durante aproximadamente minutu 10, kandidata ne’e sente la di’ak no tenke sai hosi sala, ho akompañamentu hosi ekipa médika.
“Kandidata ne’e depois hato’o deklarasaun rezignasaun no deside la kontinua konkore ba vaga Juíza Konselleira iha STJ,” dehan nia ba jornalista sira iha Mandarin, 01/10/2026.
Ho rezignasaun ne’e, númeru kandidatu ne’ebé tuir teste eskrita ba vaga STJ tun hosi na’in-33 ba na’in-32.
Membru Komisaun Rekrutamentu no Selesaun, José Pedro Camões, hateten katak kandidata ne’e lakon oportunidade atu kontinua ba vaga STJ, maibé nia nafatin iha direitu atu konkore ba vaga iha Tribunál Rekursu, tuir kondisaun konkursa.
Depois teste eskrita, juri sei halo verifikasaun ba rezultadu kandidatu sira. Tuir prosedimentu, juri sei públika lista kandidatu ne’ebé liu ba faze entrevista, no kandidatu ne’ebé la konkorda ho desizaun juri nian bele hato’o reklamasaun iha prazu loron 15.
Konkursu 2026 ne’e formalmente loke ba seis vaga Juiz Konselleiru iha STJ no nove vaga Juiz Desembargadór iha Tribunál Rekursu.
(ter)
