DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu primeiru interogatoriu, deside hodi aplika medida Aprezentasaun Periodika ba arguidu ho inisial JS.
Arguidu lori mai iha Tribunal no Ministeriu Publiku promove arguidu ho krimi omisidiu ho Forma Tentada, tanba halo krimi hasoru vitima ida iha Hera.
Iha prosesu nee Tribunal liu husi Juiz Turnu Ana Paula halo tiha identifikasaun ba arguidu, ikus mai husi Tribunal husu ba iha parte Prokurador no Defensor atu tama ba iha alegasaun.
Iha alegasaun ba krimi nee, Prokurador Antonio Tavares husu ba iha Tribunal atu aplika Medida Aprezentasaun Perodika ba arguidu, hodi hein prosesu investigasaun.
Enkuantu husi parte defeza, Defensor Publiku Manuel Sarmento mos aseita ho pedidu Ministeriu Publiku nian.
Nunee, ikus mai Juiz turnu Ana Paula deside hodi aplika medida Aprezentasaun Periodika ba arguidu, atu aprezenta aan iha Eskuadra Polisia neebe hela besik ba fulan ida dala ida, hodi hein prosesu investigasaun.
Prosesu nee prezide husi Juiz Turnu Ana Paula, Ministeriu Publiku reprezenta husi Prokurador Antonio Tavares, arguidu hetan asistensia legal husi Defensor Publiku, Manuel Sarmento.
Tuir kronolojia katak, akontesimentu nee iha Hera, besik fatin neebe ema futu manu. Tanba nee mak mosu diskusaun ruma, ikus mai akontese kazu nee. No autoridade Seguransa detein kedan arguidu hodi submete mai iha Tribunal.
(ter)
