DILI, STLTIMORLESTE.com – Tribunal Judisial Primeira Instansia Dili liu husi leitura akordaun, deside kondena arguidu ho inisial DA, tanba konsidera provadu ba iha krimi neebe Ministeriu Publiku akuza ba.
Tribunal Koletivu delibera katak, faktus sira nee provadu hotu kedan, katak iha fulan Novembru tinan 2022 iha Munisipiu ida neebe lokaliza iha Timor, arguidu uza meius oin-oin hodi ikus mai halo abuzu seksual ba lezada ida.
No Tribunal konsidera katak, provadu aktu neebe arguidu halo ba lezada nee laos foin dala ida, maibe beibeik, no akontese ba lezada nee banhira foin ho idade tinan neen.
Tribunal mos konsidera provadu, akontese tiha asaun nee lezada konta tuir ba ema ida, no ikus mai ema nee konta tuir ba lezada nia inan, hodi lezada nia inan sira husu lezada, no ikus mai sira ba hatoo keixa.
Juiz prosesu deklara, maske arguidu hili direitu nonok, maibe Tribunal bazeia ba deklarasaun lezada nia inan no sasin neebe iha, Tribunal konsidera katak faktus neebe konsta iha akuzasaun provadu hotu.
Tribunal la iha duvidas, Tribunal haree katak aktu arguidu nian presiza halo prevensaun. Tanba nee Tribunal tetu sirkunstansia hotu, no bazeia ba artigu 177 numeru 1 konjuga ho nia agravasaun artigu 182 numeru 1 husi Kodigu Penal, hodi kondena arguidu ho pena unika tinan 10.
Lee tiha desizaun nee, Tribunal mos fo hanoin ba arguidu katak, la aseita desizaun Tribunal nian bele liu husi arguidu nia defeza atu rekore fali ba iha Tribunal Rekursu, depois de simu notifikasaun husi Tribunal, ho nia prazu loron 30.
“Hau sei haree no sei halo rekursu, depois de simu notifikasaun desizaun husi Tribunal,” dehan defeza arguidu nian Fransisco Martins ba STL iha Kaikoli Kuarta nee.
Tuir observasaun STL nian iha Tribunal, iha desizaun ba prosesu nee arguidu akompanha husi nia aman rasik no mos inan rasik.
Audensia julgamentu nee prezide husi Juiz Koletivu, Jose Maria, Ersilia De Jesus, Ana Paula, Ministeriu Publiku reprezenta husi Prokuradora Bemvinda Do Rojario, arguidu hetan asistensia legal husi Defensor Publiku Fransisco Martins.
(ter)
