DILI, STLTIMORLESTE.com – Komisariu Komisaun Rekrutamentu Juiz Supremu Tribunal Justisa (STJ), Pedro Camões informa, konaba konkorentes nain 35 neebe konkore ba Supremo Tribunal Justisa, tanba iha rekrutamentu nee la iha limitasaun, no vaga nee aberta ba ema hotu.
“Vaga nee aberta ba ema hotu, la iha limitasaun no vaga nee ba iha Supremo Tribunal Justisa ba sira neebe servisu tinan 10 ba leten no ba Tribunal Rekursu nee sira neebe servisu tinan 8 ba leten. No sira nain 35 nee, hau labele dehan ba publiku katak sira nain haat nee mos iha, maibe hau hateten deit katak sira mos tuir hotu,” dehan Camões ba jornalista sira liu husi Konferensia Imprensa iha edifísiu Supremu Tribunal Justisa, Kolmera, Tersa (04/08/2026).
Nia esplika, durante nee komisaun sira la simu dokumentasaun ruma husi konkorentes sira.
Nia sublina, relasiona ho rekrutamentu ba Tribunal Rekursu no Supremu Tribunal Justisa nee, hahu loke iha loron ida fulan Julhu too loron 31 fulan Julhu tinan nee, konkorentes sira kuaze iha interesadu ba aplay vaga rua nee, ba iha Tribunal Rekursu hamutuk ema nain 22 ba juiz kareira sira neebe durante seidauk promove no tekniku sira envia ona ba iha Sentru Formasaun Juridiku no Judisiariu, no vaga ba Supremu Tribunal Justisa nee hamutuk nain 35 nee sei envia ba juri internasional sira iha Portugal.
Nia sublina, fizikamente sira envia dokumentus ba iha Tribunal Rekursu hamutuk nain 22 no Supremu Tribunal Justisa temporariamente rona husi Sentru Formasaun hamutuk nain 35 nee sira mai husi majistradu kuaze hotu-hotu hatama inklui Jurista, Defensor Publiku, Prokurador nain 3 no Dosente sira neebe meritu mais de 15 anos kareira entaun hamutuk nee mak nain 35.
No sira mos seidauk rona informasaun lo-loos sira nee hotu manda hotu liu husi eletroniku ba iha Portugal, no Juri sira hahu halo avaliasaun apartir data agora too 15 ou 20 dias nia laran halo avaliasaun ba dokumentus no ita anunsiu ba publiku.
Nia dehan, bainhira konkorentes sira reuni ho kondisoes pasa ba Tribunal Rekursu, tanba sira initividade ka kandidatu ba Supremu Tribunal Justisa no ida nee sira sei manda resposta mai, bainhira majistradu sira mai ho rezultadu negativu sei anunsiu mai iha komisariu sira atu bele esplika ba sira katak sira iha direitu atu bele halo reklamasaun ba iha Tribunal Rekursu no Supremo Tribunal Justisa.
“Sira uza sira nia direitu para halo reklamasaun, posibilidade dokumentus balun falha sira sei hateten ba Komisariu sira, ami sira sei hateten mak uza direitu reklama, entaun faze ida nee foin mak dokumentus rezultadu liu ou seidauk nee iha juri sira nia tempu, entaun husi 35 ba Supremu Tribunal Justisa no 22 ba Tribunal Rekursu posibilidade ema hanesan balun aplika fatin rua nee deit ba Tribunal Rekursu nee ba Juiz kareira deit,” dehan nia.
Nia esplika, Juri internasional sira nee seidauk bele mai iha Nasaun Timor Leste, tanba sei iha prosesu avaliasaun dokumentus kurikular nee envia liu husi eletronika no avaliasaun hotu hafoin sira bele mai.
“Agora juri internasional sira mai nee atu entrevista no ezame eskrita, ida nee mak ekilibriu tempu atu labele gasta ba iha avaliasaun dokumentus, no sira mai nee hamutuk ema nain tolu no Sekretariu tekniku ida mak lao hamutuk ho sira.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, rekrutamentu nee ho rigor atu autor judisiariu neebe tur iha STJ tenke ho kapasidade neebe diak.
“Hau fiar katak rekrutamentu nee ho rigor, atu majistradu neebe sei ba tur iha TR no STJ tenke iha kapasidade neebe diak atu lori justisa lao ba oin,” dehan nia.
Nia hatutan, ho rekursu neebe iha bele halao servisu tuir lei haruka, liu-liu deside prosesu sira neebe lori ba iha Tribunal tuir lei haruka.
(ter)
