DILI, STLTIMORLESTE.com – Labele senti laran triste no susar ho salariu ka subsidiu neebe kiik, maibe uza osan neebe iha gasta ba familia ho kontenti tanba servisu neebe mak Nai Maromak haraik mai ema ida-idak la hanesan, nafatin agradese no halao ho kontenti.
Fornesedor Merende Eskolar EBF 12 de Outubro, Genia de Jesus Soares Rodriques hatete, bainhira simu subsidiu ho montante nee natoon susar atu dehan sufisiente nomos susar atu koalia la sufisiente, tanba servisu ema mak hakarak halo servisu.
Nia dehan, servisu nudar cozinha iha eskola ida, laos simu salariu ful-fulan maibe hetan deit subsidiu neebe iha, tanba nee nafatin agradese no haksolok ho subsidiu neebe simu, uza no gastu ba familia ho haksolok.
Ami cozinha sira neebe tein ba labarik sira iha eskola nee laos simu salariu ful-fulan maibe simu subsidiu. Neebe subsidiu ba ami nee sura too loron 22 mak simu subsidiu ho montante US$ 75 ba kada cozinha. Ho valor subsidiu neebe ami simu, iha ema nia haree dehan kiik ou la sufisiente maibe ba hau pesoal atu dehan sufisiente mos susar atu koalia no la sufisiente, mais ita mak hakarak servisu nee. Neebe US$ 75 mai ami nee senti natoon ona, no agradese nafatin ba Maromak hodi servisu ho kontenti no simu ho laran haksolok ho osan oan nee hodi uza ba familia,” dehan nia ba STL iha Tasi-Tolu, Sesta (19/06/2026).
Nia hatutan, agora nee ema barak mak laiha servisu ate balun atu han ba loron ida nian mos susar, neebe ba hirak neeebe iha servisu labele haree ba valor osan neebe iha, maibe agradese nafatin ba tempu neebe Nai Maromak haraik mai ema ida-idak.
Nunee mos Clara Mendonca nudar servisu nain iha warung bakso Komoro hatete, labele halerik ba saida mak hetan ho kosar been rasik, maibe nafatin agradese no servisu ho diak tanba nai Maromak sei la husik nia ema lao mesak. Dala ruma simu ba uza, la too no la sufisiente duni, maibe atu dehan tan saida.
Ita mak hakarak servisu, neebe ho kondisaun saida deit tenke simu ho laran kontenti nafatin, fiar katak grasa ksolok nian sei iha. Importante lao ho Maromak, reza no halo orasaun nafatin, Nai Maromak sei la taka matan,” dehan nia.
Nia hatutan, servisu neebe nia halo mak hanesan fase bikan, dasa rai no hamoos meza sira. Salariu neebe nia simu iha fulan ho montante US$ 115, nia servisu tinan rua ona hodi ajuda nia kaben sustenta oan sira iha uma laran.
(dom)
