DILI, STLTIMORLESTE.com — Autoridade sira hatete la iha Timor oan ida servisu iha rede scam call center ne’ebé opera iha Timor-Leste.
Xefe Investigasaun Polísia Investigasaun Sientífika Kriminál (PSIK), Mario Francisco de A. Tavares hatete, investigasaun ba rede scam call center sei kontinua, inklui análize evidénsia dijitál.
Autoridade sira halo dezmantelamentu primeiru ba rede scam call center iha Timor-Leste iha Agostu 2025, maibé investigasaun sei kontinua.
“Investigasaun sei kontinua atu analiza prova dijitál no komprova transasaun no movimentasaun osan,” deklara Mario Francisco de A. Tavares.
Nia hatete, atividade scamming aumenta fali durante fulan Juñu, Jullu no Agostu 2026, depois autoridade sira halo operasaun iha Agostu 2025.
Autoridade sira identifika atividade scam call center ne’ebé opera iha Timor-Leste, maibé identidade autor prinsipal hosi rede ne’e seidauk determina.
“Agora investigasaun sei lao hela, no ami seidauk determina autor prinsipal loos hosi call center ida-ne’e,” nia deklara.
Tavares hatete kazu scam call center ne’ebé akontese iha fulan hirak liubá rezulta ema na’in haat hetan detensaun hosi autoridade kompetente.
Nia subliña katak, suspeitu na’in haat ne’e hotu-hotu sidadaun estranjeiru, no la iha Timor oan ida servisu iha rede call center ne’e.
Prosesu investigasaun ba kazu sira ne’e sei kontinua tuir prazu prosesual, inklui análize detalhada ba evidénsia dijitál no movimentasaun osan.
(jen)
