BAUCAU, STLTIMORLESTE.com – Eletrisidade Timor-Leste, Empreza Públika (EDTL,EP) Munisipál Baucau seidauk simu proposta kona-ba komunidade uma kain 30 resin iha Suku Libagua, Postu Administrativu Laga, Munisípiu Baucau, ne’ebé seidauk asesu enerjia eletrisidade.
Relasiona komunidade uma kain 30 resin iha Suku Libagua ne’ebé to’o ohin loron seidauk asesu enerjia eletrisidade, tanba razaun hela dook husi rin eletrisidade, Xefe Unidade EDTL,EP Munisipál Baucau, Edegar B. da Silva, hateten katak EDTL iha nível munisipál seidauk hetan informasaun kompletu kona-ba komunidade uma kain 30 resin ne’e.
“Kona-ba ida ne’e proposta ami seidauk hetan. Loloos iha ne’e ami hetan, maibé iha ne’e ami seidauk hetan. Se ami hetan ona proposta ne’e, oin seluk,” hateten Edegar ba STL iha nia knaar fatin, Vila Nova Baucau, Segunda (14/09/2026).
Nia esplika katak bainhira Autoridade Suku Libagua aprezenta proposta ba EDTL,EP Munisipál Baucau, ekipa téknika bele ba tereñu halo identifikasaun no verifikasaun hodi hatene komunidade sira ne’e bele asesu diretamente ba eletrisidade ka presiza solusaun alternativa.
Tanba tuir nia, bainhira uma kain hirak ne’ebé hela besik rin eletrisidade maibé seidauk hetan ligasaun, komunidade sira presiza halo rejistu foun iha EDTL,EP, hafoin ekipa téknika bele avalia no halo instalasaun liña eletrisidade ba uma kain sira.
Maibé, bainhira komunidade sira hela dook husi rin eletrisidade no teknikamente seidauk bele halo instalasaun, Autoridade Suku bele aprezenta proposta ba EDTL,EP atu konsidera apoiu liuhusi painel solar, tuir kritériu no regulamentu ne’ebé aplika.
Edegar subliña katak papel Autoridade Suku importante atu hatudu no formaliza nesesidade komunidade sira, tanba EDTL presiza proposta no informasaun klaru molok halo avaliasaun téknika iha tereñu.
“Entaun Suku mak tenke ativu oituan kona-ba komunidade sira ne’e. Tanba ne’e ami atu tun ba mós haree lai sira nia proposta. Mai tiha iha ne’e lai mak ami tun ba teren. Hanesan dehan uma kain 30 ne’e bele hetan, maibé ami hetan proposta ruma lai,” hateten Edegar.
(tom)
