DILI, STLTIMORLESTE.com – Lealdade folin baratu iha baze mosu wainhira militante fasil muda partidu hanesan anin huu ba mai, hatudu edukasaun sívika no ideolojia partidária sei fraku tebes.
Tendensia militante hakat afiliasaun ba partidu seluk mosu bebeik iha baze, afeta husi interese temporáriu no promesa kampaña laiha orientasaun ideolójika forte.
“Militante iha baze fasil tebes muda apoiu husi partidu ida ba seluk, hanesan anin ne’ebé huu ba mai deit,” hatete Observadór Polítika, Manuel Magno da Silva ba STL, iha Dili, Kuarta (21/10/2026)
Nia subliña, situasaun ne’e sai dezafiu boot ba partidu polítiku atu hametin edukasaun sívika no ideolojia, atu militante la sai instrumentu votasaun deit iha eleisaun.
“Dinámika ne’e hatudu sosiedade baze hahú krítiku ba promesa polítika, maske lealdade no konsisténsia sei kestaun boot,” nia hatutan.
Husi parte seluk, Akademista UNPAZ, Marcos de Jesus, hatete pratika ne’e hatudu frakeza estrutura partidária iha kraik ne’ebé ativu deit iha eleisaun.
“Estrutura partidária iha kraik fraku, ativu deit iha tempu eleisaun, husik militante laiha orientasaun ideolójika klaru,” nia esplika.
Nia hatutan, edukasaun polítika kle’an sai xave, atu hamosu maturidade demokrátika iha baze.
“Ita presiza edukasaun polítika kle’an hodi hamosu maturidade demokrátika, nune’e eleitór la monu ba lia-bosok temporária,” nia afirma.
Entretantu, kada Sabadu no Domingu partidu polítiku tun ba baze hodi hala’o konsolidasaun no simu deklarasaun afiliasaun foun husi militante partidu seluk.
Iha atividade ne’e, estrutura partidu aproveita hodi foti imajen no grava vídeo momentu simu militante foun, no publika kedas iha Facebook no TikTok hodi buka reasaun virál no dada atensaun públiku.
(car)
