DILI, STLTIMORLESTE.com – Jerasaun foun neebe konsidera aan hanesan jerasaun patriota, foti pozisaun katak lider istoriku sira presiza fo liman ba malu hodi lori nasaun ba oin. Apelu nee hatoo ho haraiik aan atu lider sira bele hatutan nafatin espíritu unidade no kaer liman hamutuk hodi nunee bele lori Timor Leste hakat ba dezenvolvimentu neebe sustentavel.
Apelu nee mosu tanba jerasaun patriota sira haree katak, estabilidade politika no unidade entre lider boot sira sai nuudar save prinsipal hodi dezafiu boot neebe nasaun enfrenta, liuliu iha kestaun ekonomia, edukasaun no kresimentu foinsae sira nia futuru.
“Uza deit dezenvolvimentu fiziku sei la too, se bele hametin uluk fundasaun unidade nasional neebe simu husi funu nain sira,” dehan Jerasaun Patriota, Januario de Araujo ba STL, Sesta nee (19/06/2026).
Iha biban nee, Januario mos fo hanoin katak dezafiu neebe Timor-Leste hasoru iha tempu agora laos ona funu hasoru kolonial, maibe hasoru kiak, dezempregu, no kualidade infraestrutura. Tan nee dezafiu sira nee presiza duni vizaun unidade husi lider nasional hotu.
Jerasaun Patriota nee mos deklara katak prontu atu fo kontribuisaun tomak hodi apoiu hakat hotu neebe lider sira foti, naran katak desizaun hotu hotu bazeia ba interese povu nian no laos ba interese grupu ka partidu politika deit.
Iha parte ketak Akademista UNPAZ, Marcos de Sousa konsidera katak apelu husi jerasaun patriota nee hanesan sinal pozitivu neebe hatudu katak, foinsae sira iha duni preokupasaun boot ba futuru nasaun nian.
Tuir nia estabilidade nasional sei la metin se nuudar lider historiku sira kontinua hatudu deit tesi lia politika neebe bele fahe malu iha baze.
Akademista nee sublina tan katak, tempu agora ona ba lider sira atu hatudu matenek politika hodi foti interese Nasional aas liu interese hotu, nunee bele kria estabilidade neebe loloos hodi fasilita prosesu dezenvolvimentu iha rai laran.
(car)
