DILI, STLTIMORLESTE.com – Daudaun nee lider rezistensia sura ho liman fuan deit, tanba nee durante moris presiza valoriza malu, maske diferente idea iha politika normal maibe labele fila kotuk malu, too mate mak vizita malu ho aifuan no lilin.
Kestaun nee hatoo husi Membru Asembleia Konstituante, Judite Dias Ximenes ba STL iha Farol, Tersa nee (23/06/2026).
Nia hatete, uluk funu lider rezisténsia ho objetivu ida deit katak mate ka moris hamutuk lori rai nee ba hetan ukun rasik aan, ohin loron rai nee hetan ukun rasik aan husu nafatin hamutuk maske diferente idea nee normal maibe labele fila kotuk malu, tanba lider rezisténsia nia hamutuk mak lori rai nee ba hetan ukun rasik aan.
“Liu liu ba nai ulun sira neebe kaer fukun Timor Leste nia katak moris nee valoriza malu, importante mak valoriza malu haree Timor oan ida hanesan Timor oan seluk, tanba ita mesak Timor oan deit, ho luta no sakrifisiu oin oin, lakon familia lakon sasan mak hetan ita nia ukun aan ida nee, no dedikasaun tomak neebe lider rezisténsia halo husi 1974 too mai ohin imi presiza valoriza malu, labele mate mak mai ho aifunan mai hakruk ida nee labele,” katak nia.
Nia hatete, nuudar sidadaun maluk Timor oan presiza valoriza malu, ida nee mak importante nuudar ema humana.
“La ba nia uma la kaer nia liman maibe valoriza malu nee mak importante, liu liu nai ulun sira valoriza malu ba, ita uluk ekipa ida, ohin mos lo-loos nafatin hamutuk ekipa ida ba libertasaun povu ida nee, se ita liberta ita nia povu maibe ita la ekipa no la forte povu kontinua terus no susar,” katak nia.
Nia hatete, diferente idea nee normal hodi ba kaer ukun no ida nee laos atu fahe malu fali no desvaloriza malu lae, prinsipiu atu kaer ukun nee mai ho ideolojia oin oin maibe ideolojia ida nee atu fahe malu.
Jerasaun Patriota no Juventude rezistensia, Jacob da Conceicao Freitas (Sakunar) hatete, ida nee fila fali ba kada pesoal ida-idak, liu liu ba aman ka tiu sira neebe balun mate ona balun sei iha nee defende ba sira ida idak.
“Iha rai ida ita ukun aan ida nee ita labele obriga karakter pesoal ba ema seluk nee dala ruma etis, maibe ida nee fila ba ema idak idak nia pesoal nuudar humanu, aumezmu tempu nuudar nia maluk funu nain ida,” dehan nia.
Hau nia mensajen ba lideransa sira liu liu ba hau nia aman sira imi hela nain hira deit ona, bele konta ho liman fuan, tanba nee bele diferente ideolojia, politika pandangan politika, maibe ita hanesan humana neebe perna lao hamutuk entau sempre fo liman ba malu,” katak nia.
Nia hatutan, ho saudozu eis Prezidente nia mate halo nuudar jerasaun patriota sente lakon tebes ema diak ida, hanesan aman rasik.
“Hau laiha relasaun familia, maibe hau nia sentimentu ba lider ida nee hanesan hau lakon hau nia aman rasik ida, tanba desde inisiu hau iha ai laran too mai vila hau hamutuk ho nia aprende politiko buat barak husi nia neebe sente katan lakon boot ida iha sorin, no sente lakon tebes, no laiha forsa atu atende situasaun ida nee, maibe realidade mak ida nee no kondisaun mak nee,” katak Jacob.
Nunee mos Lider Rezistensia Cornelio Gama L7 hatete, nia maluk rejistensia dadaun moris sura ho liman fuan deit balun moris too ohin maibe balun mate iha ai laran la joga tan ukun aan ida nee.
“Husi ailaran too mai 1999 maluk veteranus Mauhuno funu hotu tiha mai la goza buat ida lao ho biskleta ain tuur too nia mate, depois Reinacelak, mos la goja funu ida nee too mate, iha tinan 1999 veteranus Dudu, Ular, Maucalo, sira barak ami sira mai husi ai laran maske la joga maibe ami nia hakarak mak fo hela buat diak ba jerasaun foun atu lori no kaer nasaun nee ba oin,” katak L7.
(eme)
