MALIANA, BOBONARU — Komunidade Maliana, Munisipiu Bobonaru halibur iha monumentu kalan, 12 Novembru, hodi sunu lilin no hanoin fali sakrifísiu Loriku Asu’ain sira iha luta ba independénsia Timor-Leste.
Atividade komemorativa ne’e hala’o iha kalan, ho komunidade halibur hale’u monumentu no tau lilin iha nia baze. Naroman lilin sira ilumina monumentu no komunidade ne’ebé marka momentu ne’e ho hakmatek.
Partisipante sira mai husi jerasaun oioin, inklui inan-aman, foin-sa’e no labarik. Sira nia prezensa hatudu katak memória 12 Novembru la’ós responsabilidade jerasaun uluk de’it, maibé tenke kontinua iha jerasaun foun.
Iha monumentu nia leten, labarik mane balun mós hamriik besik lilin sira. Partisipasaun labarik sira ne’e sai parte importante husi komemorasaun, tanba sira mak sei lori istória no valor sakrifísiu ne’e ba futuru.
Komemorasaun 12 Novembru la’ós de’it momentu atu hanoin fali matebian sira, maibé mós atu reflete kona-ba liberdade ne’ebé hetan liu husi sakrifísiu no responsabilidade atu mantein unidade.
Komunidade Maliana, Maria da Silva, ne’ebé partisipa iha atividade kalan ne’e, dehan katak nia mai ho vontade rasik atu fó omenajen ba Loriku Asu’ain sira.
“Ami mai iha ne’e kalan ne’e atu sunu lilin ba Loriku Asu’ain sira. Ami la mai tanba ema haruka, ami mai tanba ami-nia fuan bolu,” Maria da Silva dehan ba STL, iha Jardim Setembru Negro, Maliana, Kinta (12/11/2026).
Maria hatutan katak, nia lori nia oan sira atu haree diretamente komemorasaun ne’e, hodi sira aprende no komprende istória sakrifísiu ba liberdade.
“Ha’u lori ha’u-nia oan sira mai atu sira haree ho sira-nia matan rasik. Imi tenke estuda, respeita malu no labele haluha istória,” nia dehan.
Nia dehan katak, momentu ne’e lori sentimentu triste no orgullu, tanba komunidade kontinua hamutuk hodi hanoin matebian sira.
“Ha’u sente triste, tanba hanoin matebian sira, maibé ha’u sente orgullu mós, tanba komunidade Maliana nafatin hamutuk no nafatin hanoin sira,” Maria dehan.
Iha fatin hanesan, Jerasaun Patriota, Adelino Soares konsidera katak, komemorasaun ne’e hatudu espíritu 12 Novembru kontinua moris iha komunidade.
“Loriku Asu’ain sira la mate saugati. Sira-nia isin lakon, maibé sira-nia espíritu nafatin iha ita-nia leet,” Adelino Soares dehan.
Adelino subliña katak, sunu lilin labele limita ba ritualidade ka serimónia, maibé tenke sai kompromisu atu kontinua luta ho dalan dame, liuhusi edukasaun, unidade no dezenvolvimentu.
“Sunu lilin ne’e promesa ida. Ita promete katak sei kontinua luta ho dalan dame, hasoru kiak, la-hatene no fahe-malu,” nia dehan.
Nia mós husu ba juventude Maliana atu valoriza sakrifísiu jerasaun uluk, liuhusi estudu, unidade no domin ba rai.
“Imi tenke estuda, hamutuk no hadomi rai ne’e hanesan Loriku Asu’ain sira hadomi,” Adelino husu ba juventude.
Komemorasaun iha Maliana ne’e hatudu katak memória 12 Novembru kontinua moris iha komunidade. Maibé, responsabilidade jerasaun foun mak transforma memória sakrifísiu ne’e sai hahalok no kompromisu ba futuru nasaun.
(car)
