DILI, STLTIMORLESTE.com – Membru FALINTIL-Forsa Defeza Timor Leste (F-FDTL) nain sanulu resin lima (15) remata ona kursu formasaun Multimedia nian iha Sentru Formasaun Jornalista (SFJ) Timor Post.
“Kursu Multimedia nian neebe membru F-FDTL nain 15 aprende iha fulan Abril nia laran kuaze fulan ida no ohin remata ona,” hatete Xefe Estadu Maior bxFALINTIL-Forsa Defeza Timor Leste (F-FDTL), Brigadeiru Jenerál José da Costa Soares “TRIX” ba jornalista sira salaun Auditorium Kuartel Jenerál F-FDTL Fatuhada, Dili, Segunda lokraik (02/06/2025).
Nia tenik, kona-ba liafuan ida Multimedia nee iha komplexu ida, entaun atu too iha nia komplexidade nee mai hahu husi baze, mai too mediu mak foin sae ba leten.
Nia esplika, tanba nee kona-ba kursu formasaun nee hahu husi Forsas Armadas eziste Komando fo prioridade iha planu atu kapasita rekursu umanus F-FDTL, laos iha deit area Media ninian maibe iha mos area oin-oin neebe sira nain sanulu resin lima (15) nee mai husi Komponente no Unidade sira mai atu aprende no fila fali ba aplika iha sira nia Komponente no unidade neebe sira servisu ba.
“Ita nia membru F-FDTL nain 15 neebe ohin remata ona kursu ba Multimedia nee mai husi Komponente Terrestre, Komponente Navál, Komponente Aéreo, sira nia objetivu nee atu mai aprende hodi fila-fali transmite saida deit mak Komando F-FDTL halao no fo sai iha Media Instituisaun F-FDTL nian,” nia deklara.
Iha fatin hanesan, Sekretáriu Estadu Komunikasaun Sosiál, Expedito Loro Dias Ximenes esplika, kona-ba jornalizmu no meus komunikasaun sosial no agora iha mundu avansadu teknolojia, hotu-hotu domina ona informasaun liu husi multimedia.
“Dala barak ita koalia jornalizmu hanesan sensia ida, no ema neebe hakarak sai jornalista nia tenke aprende,” nia informa.
Nia hatutan, IX Governu Konstitusionál oras nee daudaun fo atensaun makaas ba iha dezenvolvimentu iha area Komunikasaun Sosiál, tanba dezenvoliventu era dijitál.
“Sei ita labele atualiza ita nia aan iha avansu teknologia ida nee, husi ida nee ita sei hela iha kotuk, tanba nee hau hakarak agradese ba Instituisaun F-FDTL neebe bele autoriza formandu nain 15 neebe bele sai media ofiser iha Instituisaun F-FDTL nian ho diak liu tan,” nia afirma.
(jen)
