DILI, STLTIMORLESTE.com – Membru FALINTIL – Forsa Defeza Timor Leste (F-FDTL) nain 20 remata kursu Public Speaking durante loron sanulu (10), treinamentu nee halao husi Instituisaun Euros Group.
Xefe Planeamentu F-FDTL, Koronel Constantino Moreira iha nia diskuti katak, treinamentu ida nee importante tebes ba militár ofisiais sira, atu nunee bele hasae sira nia konhesimentu oinsá hamriik iha palku leten hodi koalia ba publiku.
Xefe Planeamentu F-FDTL, Koronel Costantino Moreira hatoo agradesimentu ba azensia sira no parseiru sira hotu, liu-liu ba formadu nain 20 neebe remata ona formasaun lideransa nian.
“Sira nee povu nia oan, sira nee formadu ona para atu sai lideransa ba ami nia Instituisaun F-FDTL rasik, no sira nee sei ba moris hamutuk ho sira nia estrutura tomak ho nia soldadu sira,” hatete Koronel Constantino Moreira liu husi nia diskuru iha Kuartel Jeral F-FDTL, Fatuhada, Dili, Sesta (21/02/2025).
Nia esplika, kondisaun ida nee inisiativa husi rekursu umanus nia, oinsa ami bele kapasita ami nia lideransa sira para bele apoiu sira durante sira nia lideransa ba nia estrutura tomak,” nia informa.
Nia deklara, kursu sira hanesan nee instrumentu neebe diak no elementu neebe diak, bele ajuda membru sira atu sai kualidade iha lideransa F-FDTL nian.
“Hau agradese ba parseiru EIROS neebe kooperasaun diak ho ami, karik iha oportunidade seluk oinsa bele ajuda ita nia kapasidade, ita nia konhesimentu hodi ita bele kumpri servisu no misaun sira nebee ita asumi,” nia koalia.
Iha fatin hanesan, Adido Defeza Australia, Capitao Mar e Guerra Matthew Richardson esplika, previleiju ida bele mai iha nee hodi selebra momentu inkrivel ida nee ba membru F-FDTL nain 20 neebe remata ona kursu formasaun diskursu publiku no abilidade aprezentasaun.
“Lori Programa Kooperasaun Defeza nia naran, hau hakarak fo parabens ba estudante nain 20 prezente iha nee ohin, ba ita boot sira nia servisu makaas no dedikasaun durante semana rua,” dehan nia.
Nia informa, diskursu publiku laos atu hamriik deit iha ema barak nia oin hodi hatoo deit liafuan balu, maibe ida nee kona mos ba fiar aan, klareza no koneksaun.
“Durante semana rua, ita boot sira ultrapasa ona, tauk no dezafiu sira, no deskobre ona poder husi ita boot nia lian rasik, nee laos prestasaun kiik, maibe abilidade neebe ita boot sira manan ona, tantu forma mensajen interesante ruma, envolve audensia ka koalia ho konviksaun
mak hanesan aparelu neebe sei serve ba ita boot nia moris tomak, iha ita boot nia lideransa iha F-FDTL, no mos iha komunidade nia laran no entre kolega sira,” nia deklara.
Durante semana rua, estudante sira servisu makaas ona atu melhoria nia abilidade diskursu publiku. “Hau hakarak rekonhese estudante nain rua, Kapitaun Dos Santos no Alferes Gusmao, imi nia servisu makaas no komitmentu hatuur ona ezemplu ida ba ema hotu. Dezeju imi susesu nafatin no kontinua uza imi nia lian hodi inspira ema seluk,” katak nia.
Nia koalia, Australia no DCP orgulhu atu parseria ho Timor Leste no F-FDTL, atu apoiu dezenvolvimentu profísional ofisiais F-FDTL nian.
“Kursu nee refleta ita nia komitmentu partilhadu, hodi haforsa ita nia ema sira liu husi dezenvolve abilidade no treinamentu. Hau mos hakarak espresa hau nia apresiasaun ba ekipa F-FDTL neebe envolve hodi koordena oportunidade ida nee ba estudante sira neebe ohin marka prezensa,” nia teknik.
Nia hatoo parabens no hau fiar katak, ita boot sira hakat sai husi fatin ida nee nunka dúvida kona-ba liafuan nia poder, uza liafuan sira hodi eleva, eduka no lidera. Kontinua koalia, kontinua krese no importante liu kontinua fiar aan, palku nee imi nian,” nia koalia.
Nunee mos Formador Leovigildo da Costa Hornai esplika, formasaun ida la forma ema atu ema transforma kedas, maibe hau fiar ba oin ita atu introdus buat ida profesionalizmu sei iha ba ita nia lideransa Forsa Armada, ida nee ho kualifukasaun ho nia kompetensia adapta kontratu rejional no mundial,” nia afirma.
(jen)
