DILI, STLTIMORLESTE.com – Mini Resto Nantini iha Atabae bele hetan rendimentu to’o US$ 260 kada loron, liuliu iha fim de semana bainhira vizitante barak.
Nain Mini Resto Nantini, Agustina de Fatima hatete, rendimentu ne’e aumenta iha Sesta-feira to’o Domingu, tanba ema barak halo viajen entre munisípiu sira iha fim de semana.
“Loron ida bele hetan rendimentu to’o US$ 260, no ki’ik liu mak US$ 240. Maibé Segunda-feira to’o Quinta-feira, hetan deit US$ 100 resin,” dehan Agustina ba STL iha tasi-ibun Erkina, Atabae, Segunda-feira (28/09/2026).
Agustina hatete, menu iha Mini Resto Nantini maioria uza produtu lokal, hanesan ikan, na’an karau no na’an rusa, ne’ebé la sosa husi loja.
Nia esplika, ikan no na’an sira tein ka tunu bainhira konsumidór tama, atu garante hahán fresku no bele tuir preferénsia konsumidór.
Konsumidór balun hakarak hahán tein tasak didi’ak, enkuantu balun prefere setengah tasak. Ba ema ne’ebé hakarak hahán lalais, iha katupa ne’ebé prontu ona.
Agustina hatete, konsumidór sira mai iha fatin ne’e liuliu ema ne’ebé halo viajen ho kareta no motor. Bis pasajeiru sira, tuir nia, normalmente liu husi Loes no la para iha fatin ne’e.
Katupa fa’an ho folin US$ 0.10 kada ida, enkuantu folin ikan no na’an varia tuir medida, husi US$ 2 to’o US$ 15.
Menu ikan inklui medida ki’ik, naton no boot. Ikan medida naton fa’an lima ho folin US$ 10 resin, enkuantu ikan boot fa’an tuir kilograma, ho folin entre US$ 10 no US$20.
Agustina hatete, sira sosa ikan diretamente husi peskadór sira iha área Biakou, Areia Laran no Suliran. Dala ruma peskadór lori ikan mai, no dalan seluk sira ba sosa diretamente iha sira nia fatin.
“Ikan sira kuandu hotu, ami tenke ba sosa fali atu bele fornese nafatin ba ema ne’ebé mai vizita no han iha fatin ne’e,” dehan nia.
Nia hatete, Mini Resto Nantini emprega traballadór na’in tolu, no kada traballadór simu saláriu US$ 80 kada fulan.
Traballadór Elvina Maia hatete, servisu hahu dader tuku 07:15, ho limpeza no arrumasaun fatin, depois prepara katupa no hahán ba konsumidór sira.
Tuir Elvina, servisu kontinua to’o tuku 21:00, antes traballadór sira fila ba uma.
Nia hatete, maski dala ruma sente kole bainhira konsumidór menus, nia kontenti nafatin tanba servisu ne’e ajuda hetan osan ba nesesidade loroloron.
“Hau seidauk harii uma-kain ka iha família foun, nune’e osan ne’e sufisiente hela atu uza ba nesesidade loron-loron,” dehan Elvina.
Elvina hatete, osan balun uza ba transporte loro-loron, ho patraun fó US$ 1.50 kada loron ba traballadór sira atu selu transporte ba mai.
Nia mos hatete, rendimentu loroloron rai no kontrola depois servisu remata, no dadeer kontrola hahán no bebida sira, inklui Coca-Cola, bee, Delos, Bintang no ABC.
Vizitante Kaylia Pereira hatete, nia gosta han iha Mini Resto Nantini bainhira halo viajen entre Maliana no Dili, tanba menu sira uza produtu lokal.
Nia hatete, ikan no na’an ne’ebé fa’an iha fatin ne’e fresku no sabor, tanba produtu sira la mai husi loja ka importasaun, maibé sosa husi produsaun lokal.
(dom)
