DILI, STLTIMORLESTE.com – Prezidente Autoridade Munisipiu (PAM) Dili kontinua espande no hadi’a sistema estasionamentu atu fasilita atividade públika iha kapital.
PAM Dili, Francisco dos Santos hatete, espansaun ne’e importante atu apoia servisu públiku no fasilita asesu komunidade.
“Kona-ba estasionamentu, ita sei kontinua halo espansaun no hadi’a sistema estasionamentu tanba área ne’e importante,” hatete Francisco dos Santos ko’alia ba STL iha Salaun Madre Canosa, Becora, Dili, Sesta-feira (25/09/2026).
Francisco dehan, Autoridade Munisipiu Dili sei analiza sistema estasionamentu atu garante organizasaun, seguransa no livre pasu ba komunidade.
“Ami sei analiza sistema estasionamentu atu garante organizasaun diak, seguransa no livre pasu ba ema sira,” nia esplika.
Nia hatete, implementasaun sistema ne’e sei hala’o tuir prioridade no disponibilidade orsamentu iha tinan sira oin mai.
Iha fatin ketak, Juanico Amaral, responsavel estasionamentu iha oin Hotel Timor no Jardim 5 de Maio, informa kona-ba sistema pagamentu.
“Motorista sira ne’ebé para iha estasionamentu tenke selu tuir oras. Oras ida selu 10 centavos,” nia informa.
Nia hatete, veíkulu ne’ebé para liu oras tolu tenke selu tarifa diferente, inklui kareta no motór.
Juanico husu motorista sira atu kumpre regra pagamentu tanba kontribuisaun ne’e importante ba manutensaun no servisu públiku.
(jen)
