DILI, STLTIMORLESTE.com – Prezidente Autoridade Munisipiu (PAM) Dili prevee orsamentu besik US$ 400,000 ba manutensaun jardim no área públika iha 2027.
PAM Dili, Francisco dos Santos hatete, proposta ne’e atu responde ba kondisaun jardim no área públika ne’ebé presiza manutensaun.
“Ba tinan ne’e, ami prevee orsamentu besik US$ 400,000 ba manutensaun jardim no área públika ne’ebé presiza atensaun,” hatete Francisco.
Nia ko’alia ba STL iha Salaun Madre Canosa, Becora, Dili, Sesta-feira (25/09/2026).
Francisco esplika, kalkulasaun inisiál hatudu nesesidade orsamentu tomak bele to’o besik US$ 1.5 millaun.
Maibé, proposta ne’e hetan alterasaun durante prosesu aprovasaun iha komisaun parlamentar, no montante besik US$ 400,000 mak konsideradu.
Nia dehan, iha 2025, limitasaun orsamentu afeta manutensaun no dezenvolvimentu infraestrutura iha área munisipál.
Orsamentu ne’ebé planeadu antes la hetan alokasaun kompletu husi Ministériu Turizmu no Ambiente.
“Ho limitasaun orsamentu, ami la bele hala’o atividade hotu tuir planeamentu. Ami prioritiza atividade urgente,” nia deklara.
Nia informa, ba 2027, PAM Dili prevee orsamentu adisionál ba manutensaun no implementasaun programa sira.
Primeiru-Ministru mos konkorda ho proposta atu aloka orsamentu ba manutensaun no implementasaun programa sira.
Iha fatin ketak, akademista UNTL, José Costantino Ximenes, kritika kondisaun manutensaun Jardim Largo Lecidere.
Nia hatete, sistema iluminasaun iha jardim la diak, ai-funan barak mate, no área ne’e uza hodi faan sasan.
“Jardim Largo Lecidere, Jardim 5 de Maio no Jardim Motael presiza prioridade manutensaun husi autoridade,” afirma José.
Nia husu PAM Dili atu hasa’e kontrolu, atu evita jardim no área públika sira sai fatin komérsiu ba negosiante.
(jen)
