DILI, STLTIMORLESTE.com — Primeiru-Ministru (PM) Kay Rala Xanana Gusmão sei asiste lansamentu dokumentáriu “REZISTÉNSIA ka RESISTANCE 1975–1999”, ne’ebé sei realiza iha Tersa-feira (29/09/2026), iha Platinum Cineplex, Dili, nu’udar parte hosi Dili International Film Festival (DIFF) 2026.
Antes lansamentu, Reprezentante Espesiál Sekretáriu-Jerál Nasaun Unidas (ONU) ba Konsulta Populár iha Timor-Leste no Xefe Misaun UNAMET iha 1999, Ian Martin, hamutuk ho ekipa produsaun dokumentáriu, Segunda-feira (28/09/2026) aprezenta filme ne’e ba PM Xanana Gusmão iha Palásiu Governu, Dili.
Aprezentasaun ne’e mos marka prezensa Diretór Filme, Ian White, ne’ebé lidera ekipa produsaun dokumentáriu kona-ba istória luta Rezisténsia Timor-Leste durante períodu 1974–1999.
Ian Martin hateten katak, nia kontente tanba bele fila fali mai Timor-Leste no iha oportunidade atu servisu hamutuk ho ekipa produsaun dokumentáriu ne’e.
“Kontente tanba mai fali Timor. Iha ne’e ha’u hamutuk ho Diretór Filme, Ian White, ne’ebé daudaun prodús hela filme kona-ba istória Rezisténsia Timor-Leste,” dehan Ian Martin.
Kooperasaun Institusionál
Produsaun dokumentáriu ne’e hala’o liuhosi kooperasaun entre ekipa produsaun, Gabinete Primeiru-Ministru (GPM), Arkivu no Museu Rezisténsia Timor-Leste (AMRT) no instituisaun relevante sira seluk.
Diretór Metresi Film Production, Ian White, hato’o agradecimentu ba Governu Timor-Leste, liuliu GPM no Gabinete Prezidente Repúblika, tanba apoiu no kooperasaun durante prosesu produsaun.
“Ha’u sente kontente tanba iha responsabilidade boot atu halo filme kona-ba istória Rezisténsia Timor-Leste nian hosi tinan 1974 to’o 1999,” dehan Ian White.
Foka ba Jerasaun Foun
Dokumentáriu ne’e foka atu hatudu ba públiku, liuliu jerasaun jovem, kona-ba akontesimentu istóriku iha Timor-Leste durante períodu 1974 to’o 1999, inklui luta Rezisténsia povu Timor-Leste.
Estreia dokumentáriu “REZISTÉNSIA ka RESISTANCE 1975–1999” sei hala’o iha Platinum Cineplex iha 29 Setembru 2026, ho prezensa PM Xanana Gusmão no konvidadu sira hosi instituisaun no entidade oioin.
Hafoin estreia, dokumentáriu ne’e sei kontinua ho sesaun exibisaun iha Museu da Resistência iha inísiu fulan Outubru, antes lori ba sidade sira seluk iha Timor-Leste durante 2026 no 2027, molok aprezenta ba públiku internasionál.
(jos)
