DILI, STLTIMORLESTE.com – Parlamentu Nasional (PN) husu Ministériu Interiór (MI) no Komando Polísia Nasionál Timor-Leste (PNTL) atu garante transparénsia no aselera prosesu rekrutamentu ba kadetes polísia foun nain 750 iha tinan 2026.
Deputada Bankada Kongresu Nasionál Rekonstrusaun Timor-Leste (CNRT), Cedelizia Faria dos Santos, hatete katak PN foin lalais aprova orsamentu retifikativu neebé inklui alokasaun ba rekrutamentu kadetes PNTL nain-750.
Tuir Cedelizia, prosesu rekrutamentu tenki bazeia ba kritériu neebé klaru, justu no transparente, atu garante Timor-oan hotu-hotu neebé iha kapasidade bele partisipa no konkore ba vaga neebé disponivel.
Nia subliña katak, kritériu rekrutamentu labele fó prioridade ba oan membru PNTL, maibé tenki fó oportunidade hanesan ba Timor-oan hotu neebé iha interese atu servisu iha PNTL.
Hau hanoin prosesu hotu tenki lao ho transparénsia. Se presiza loke ba públiku, diak liu ita loke ba públiku. Ita labele kria fali dekretu-lei atu taka dalan ba joven sira no fó prioridade ba membru polísia nia oan sira,” hatete Cedelizia ba jornalista sira iha Sala Bankada CNRT, Dili, Kuarta (02/09/2026).
Deputada nee mós husu Komisaun Rekrutamentu atu garante prosesu ida neebé justu no transparente, liuliu tanba prosesu rekrutamentu anterior hetan alegasaun kona-ba iregularidade, neebé ikus mai halo Primeiru-Ministru kansela prosesu nee.
Nia dehan, komisaun tenki uza sistema rekrutamentu neebé diak, nakloke no bele akompaña hosi públiku, atu garante kandidatu neebé liu mak sira neebé iha kapasidade, no laós tanba iha relasaun familiár ka aman boot.
Hau husu ba Komando PNTL, liuliu lideransa sira, no Ministru Interiór atu tau atensaun ba ida-nee. Ita lakohi atu depois kandidatu sira pasa no ikus mai mosu fali deskontentamentu, too Primeiru-Ministru tenki kansela prosesu tanba iregularidade iha rekrutamentu,” dehan nia.
Cedelizia afirma katak problema neebé akontese iha prosesu anterior tenki sai hanesan lisaun ba governu atu hadia sistema rekrutamentu iha futuru.
Hanesa reprezentante povu, ami husu deit atu halo rekrutamentu ida neebé transparente, kumpri lei no nakloke ba ema hotu-hotu, tanba Timor-oan hotu-hotu iha direitu hanesan atu sai polísia,” nia hatete.
Molok nee, iha reuniaun Konsellu Ministrus (KM), Kuarta (03/06/2026), Governu aprova ona Projetu Rezolusaun Governu neebé aprezenta hosi Ministru Interiór, Francisco da Costa Guterres, kona-ba definisaun nesesidade anuál ba pesoál PNTL neebé sei rekruta iha tinan 2026, hamutuk nain-750.
(alb)
