DÍLI, STLTIMORLESTE.com – Polísia Nasional Timor-Leste (PNTL) Aileu publika lista kandidatu Kadetes Polísia foun 2026 iha kuarta-feira liu ba.
Komandante PNTL Munisípiu Aileu, Superintendente Xefe António da Luz hatete, lista naran sira taka iha kuadru avizu.
“Husu juventude Aileu oan sira atu mai haree naran sira ne’ebé publika ona,” hatete Komandante PNTL Munisípiu Aileu, Superintendente Xefe António da Luz ba STL liu husi telefone, iha Aileu, Sesta-feira (25/09/2026).
António hatete, kandidatu sira presiza haree lista atu hatene estatutu aplikasaun no rezultadu prosesu seleksaun.
“Iha informasaun Komando, total kandidatu la admitidu ka la pasa hamutuk 43 ema,” nia esplika.
Nia informa, maioria kandidatu ba Kadetes Polísia foun 2026 hetan aprovasaun iha prosesu seleksaun.
Nia argumenta, prosesu seleksaun hala’o ho transparente no justu, tuir kritéria ne’ebé Komandu Jerál PNTL estabelese.
António husu kandidatu la pasa atu labele lakon esperansa no kontinua prepara an ba oportunidade seluk.
“Oportunidade seluk sei bele mai iha tempu oin, tuir nesesidade no prosesu rekrutamentu PNTL,” nia deklara.
Iha fatin ketak, kandidatu PNTL foun, Costantino da Costa Ximenes kontente ho prosesu rekrutamentu ne’e.
Nia husu atu prosesu rekrutamentu hala’o ho transparénsia no evita familiarismu durante teste no seleksaun.
“Ita husu rekrutamentu loke dala rua labele iha tan familiarismu, tanba ami mos hakarak teste ho diak no onestu,” nia afirma.
Tuir dadus ne’ebé publika, total kandidatu dokumentu reverifika hamutuk 12.874 ema, enkuantu Díli iha 3.416 kandidatu admitidu ba re-teste.
(jen)
