DILI, STLTIMORLESTE.com – Polisia Nasional Timor Leste (PNTL) liu husi Komando PNTL Munisipiu Dili, husu ba adeptus jogu mundiál futbol atu labele barulhu iha Sidade Dili, tanba estadu Timor Leste lutu durante semana ida ba falesimentu Saudozu Francisco Guterres Lu-Olo.
Nia dehan, Komando PNTL Munisipiu Dili prontu simu orientasaun husi Governu atu halao patrulhamentu no segurasa masimu iha Sidade Dili no kalan operasaun ba adeptus sira atu labele barulhu, tanba Governu deside ona katak Timor Leste lutu metan kuaze semana ida nia laran.
“Ami Autoridade Polisia Nasional Timor Leste prontu halo patrulhamentu no operasaun ba adeptus sira no fo segurasan iha sidade Dili, tanba ita nia Governu deside ona TL lutu metan kuaze semana ida,” hatete Komandante Operasaun PNTL Munisipiu Dili, Superintendente Assistente Luis Amaral ba jornalista sira iha rezidensia Maktoban Francisco Guterres Lu Olo, Tersa (23/06/2026).
Nia esplika, PNTL husu ba joven sira bele nonton bola iha ida -idak nia uma, maibe keta barulhu no gas motor ba mai iha sidade Dili, tanba PNTL sei la tolera, tanba TL lakon ninia lider diak neebe sei lutu metan kuaze semana ida laran.
Antes nee Ministru Interior (MI) fo orientasaun ba Polisia Nasional Timor Leste (PNTL) atu halo patrulhamentu no operasaun ba adeptus jogu mundial futbol atu labele barulhu, tanba Timor Leste lutu durante semana ida ba falesimentu Saudozu Francisco Guterres Lu-Olo.
“Hau haruka ona PNTL halo patrulhamentu no operasaun ba adeptus sira hotu atu bele sira hotu atu bele hakmatek iha ida-idak nia fatin tanba ita semana ida lutu metan hafoin ita nia eis Prezidente Francisco Guterres Lu-Olo hakotu nia jornada moris iha Malazia,” nia Informa.
Nia deklara, TL lakon nia eroi boot ida neebe didika nia aan tomak ba rai ida nee hodi hetan nia libertasaun nasionál, tanba nee husu ba joven sira liu-liu povu TL atu lutu ba Saudazu Francisco Guterres Lu-Olo nia mate kuaze semana ida.
Governate nee husu ba Adeptus sira iha Timor Leste atu hotu-hotu hakruk ba saudozu nia mate no MI haruka ona PNTL atu kontrola ba fatin-fatin, atu nunee adeptus labele barulhu iha tempu kalan.
MI husu ba joven sira bele nonton bola iha ida -idak nia fatin,maibe labele Barullu no haklalak no gas motor hanesan loron baibain,no husu mos ba ema hotu iha semana ida nee nia laran labele halo festa toka muzika,no ba motorista liu-liu mikorlet sira atu tau muzika ho lian kiik, tanba TL lutu metan hela
“Agora husu ba joven sira lutu metan ba loron 7, tanba nee Autoridade segurasa PNTL sei hare mos ‘Layar’ boot sira neebe iha fatin publiku sei taka provizoriu semana ida hafoin loke fila-fali,” nia afirma.
(jen)
