DILI, STLTIMORLESTE.com – Komando Jerál Polísia Nasionál Timor-Leste (PNTL) liu husi Komando PNTL Munisipiu Dili hatun efetivu polisial hamutuk rihun ida (1.000) hodi garante seguransa no ordem publika durante prosesu simu, transladasaun no serimónia funebre ba restu mortais Dom Norberto Ricardo, ne’ebé sei halao durante loron 10 iha territóriu Timor-Leste.
Informasaun nee hatoo husi Komandante PNTL Munisípiu Dili, Komisáriu Assistente Polísia Orlando Gomes, iha nia intervensaun iha parada jerál ba operasaun konjunta seguransa, iha Komandu PNTL Kaikoli, Dili, Tersa (01/0/2026).
Orlando Gomes, neebe nuudar Komandante Taktikál Operasaun Terrenu, hateten katak operasaun ne’e halao tuir orden hosi Komandu Jerál PNTL liuhosi Komandante Operasaun Nasionál, ho objetivu prinsipal atu garante seguransa, ordem publika no movimentu ba restu mortais Dom Norberto Ricardo.
“Ita nia misaun klaru, primeiru ita garante no asegura movimentu ho respeitu ba ita nia restu mortais, hahú hosi simu iha fatin serimonia, kontinua vizita ba Laleia no fila fali mai remata misa iha Tasi Tolu, depois serimónia fúnebre iha Katedral,” nia Informa.
Tuir nia esplikasaun, responsabilidade PNTL laos deit atu asegura movimentu restu mortais, maibe mos atu garante ordem públika no responde ba kualker situasaun seguransa neebe bele mosu durante prosesu loron 10.
Nia subliña katak PNTL sei fo protesaun ba lideransa Igreja, autoridade sira no konvidadu prinsipál sira, inklui lider relijiozu sira neebe sei partisipa iha serimónia sira durante períodu nee.
“Ita halo prevensaun ba kualker ameasa no distúrbiu ordem públika, atu nunee ita bele prevene situasaun no garante seguransa ho diak,” nia esplika.
(jen)
