DÍLI, STLTIMORLESTE.com – Polísia Nasional Timor-Leste (PNTL) Munisípiu Dili identifika konflitu entre grupu arte marsiál, disputa rai, problema viziñu no konsumu bebida alkóolika.
Komandante PNTL Munisípiu Dili, Komisáriu Asistente Polísia Orlando Gomes esplika, autoridade halo análize kona-ba konflitu no ameasa seguransa.
“Tuir investigasaun, konflitu entre viziñu sira dala barak mosu tanba barullu, disputa limite rai no diferensa hanoin,” hatete Orlando Gomes.
Nia hatete, konsumu bebida alkóolika mós kontribui ba konflitu, liuliu durante festa, serimónia no eventu sosiál ne’ebé bele hamosu provokasaun.
Konflitu seluk liga ho problema pesoál, grupu joven, atividade ritual, arte marsiál, asidente tráfiku no disputa entre kondutór.
“Ita atu prevene konflitu, autoridade presiza analiza área risku, prepara planu prevensaun no aumenta patrullamentu iha fatin vulnerável,” nia esplika.
Aleinde patrullamentu, autoridade presiza halo sosializasaun ba komunidade, liuliu joven sira, kona-ba prevensaun provokasaun no konflitu.
Orlando Gomes argumenta, prevensaun presiza envolve lideransa komunitária, polísia no komunidade atu identifika kauza no hametin seguransa.
Nunee mos Joven Suku Comoro, Sonio dos Santos hatutan, konflitu dala barak mosu tanba joven sira hemu alkóolika no provoka malu.
Nia hatete, konflitu akontese iha Beto Barat no Beto Timor, liuliu bainhira joven sira hemu no halo festa.
“Bainhira hemu lanu, grupu arte marsiál komesa sadik malu, hamosu baku malu no halo ema kanek, balun grave,” nia deklara.
Sonio afirma prezensa Polísia importante atu ajuda kontrola situasaun no rezolve konflitu ne’ebé mosu iha komunidade.
Iha fatin la hanesan, Xefe Suku Comoro, Eligio José Marçal mos hatete, konflitu iha suku ne’e menus tanba joven sira promove unidade, dame no buka servisu.
“Konflitu iha Suku Comoro menus, tanba joven barak lakohi problema. Bainhira konflitu mosu, ami informa Polísia atu atua lalais,” nia esplika.
Nia dehan, kooperasaun entre autoridade lokál, Polísia no komunidade importante atu prevene konflitu no mantein estabilidade iha Suku Comoro.
(jen)
