DILI, STLTIMORLESTE.com – Polisia Nasional Timor Leste (PNTL) liu husi Diresaun Servisu Investigasaun Kriminál (DSIK) klarifika kazu suspeitu nain rua neebe naok telefone hodi rezulta Nandine mate iha Praia dos Cuqueiros iha Domingu (7/6) foin lalais nee.
Nia dehan, suspeitu nain rua neebe ekipa konjunta kaptura ho inisiál JACR no MZX.
“Kazu naok iha area Praia dos Cuqueiros, PNTL detein ona suspeitu nain rua, suspeitu nain-rua horiseik ami kaptura iha oras meudia iha BTN Tasi-Tolu,” hatete Portavós Komando Jerál PNTL Superintendente Polísia João Belo ba jornalista sira liu husi Konferensia Imprensa neebe halo iha Kuartel Jerál PNTL Kaikoli, Tersa (09/06/2026).
Nia esplika, suspeitu nain rua nee molok nee mai halo asaun loron tolu liu iha loja Gracia Kampung Baru nia kotuk, no motor neebe sira uza hodi hadau sasan iha Praia dos Cuqueiros nee mos loron tolu liu ba sira naok.
“Prosesu sira nee ita sei akumula aprezenta ba Tribunál, agora sei iha ami nia liman hodi detein ba 72 oras, depois de 72 oras ami submete ba Tribunál,” nia informa.
João Belo esplika, suspeitu nain rua ba kazu nauk telefone neebe rezulta Nandine mate, PNTL rejista ho NUC 0206/2026PNSIK .
“Pasta neebe mak sira hadau iha fatin akontesimentu no depois motor neebe sira uza nee ami mos informa ba públiku atu ema neebe sente nia motor lakon iha loja Gracia nia kotuk iha loron tolu liu ba atu mai fo informasaun ba lalaok nia motor lakon”, nia hatutan.
Nia koalia, ba kazu neeba kontinua halo investigasaun no investigasaun sei lao .
“Neebe hau labele esplika detalhu se se mak sei bolu, maibe deklarasaun sira neebe mak ita hetan husi sasin sira, ita sei buka tuir nafatin atu hatene”, nia relata.
Superintendente Xefe Polísia João Belo ba kazu roubo neebe rezulta Nandine mate PNTL kontinua husu Ministeriu Públiku atu kontinua buka tuir ema neebe envolve kazu nee, tanba suspetadu suspeitu sira nee iha grupu tanba nee polísia kontinua buka tuir.
Iha biban nee nia husu ba inan-aman sira atu eduka oan sira atu respeita ema seluk, depois husu mos ba inan-aman sira se sente nunka sosa motor ruma ba nia oan sira maibe oan sira sai uza motor tenke buka tuir hodi hatene motor nee se nia.
“Nunee ita labele halo toleransia ba oan sira nia asaun krime neebe mak prejudika ema seluk nia direitu no ema seluk nia sasan,” nia afirma.
(jen)
