DILI, STLTIMORLESTE.com – Povu Timor Leste (TL) ho mata-been simu Saudozu Francisco Guterres Lu-Olo nia kadaver iha Aeroportu Internasional Nicolau Lobato, Komoro, Dili, loron Tersa, tuku 06:33 OTL.
Observasaun STL nia iha terenu katak, Maktoban Francisco Guterres Lu-Olo nia kadaver simu direita husi membru Governu no familia ho parada militar molok translada mai iha rezidensia matebian nian iha farol, Dili.
Saudozu hetan akompanha direita husi nia espoza, Dona Cidalia Lopes Nobre Mouzinho Guterres ho oan nain haat (4) hanesan Francisco Cidalino Nobre, Nobrezino Guterres, Samd no Dalia Luliana Nobre Guterres akompanha mos Mari Bin Amude Alkateri.
Prosesu hatun kadaver husi aviaun Aero Dili hetan akompanhamentu husi Primeiru Ministru Interinu, Mariano Assanami Sabino ho membru FALINTIL -Forsa Defeza Timor Leste (F-FDTL) 10 hodi lori ba iha parada fatin no entrega fali ba Membru F-FDTL nain walu hodi simu ho parada hafoin nee lori mate isin ba iha fatin neebe governu prepara ona karru funerariu.
Iha Aeroportu simu direita mos husi familia maktoban, reprezenta Presidente Republika Xefe Casa Sivil, Eis Prezidente Republika Taur Matan Ruak, Xefe Estadu Maior Jeneral FALINTIL-Forsa Defeza Timor Leste (F-FDTL), Tenente Jeneral Domingos Raul “Falur Rate Laek” veteranus sira hanesan Lere Anan Timur inklui kuadru Partidu FRETILIN nian.
Iha Aeroportu Internasional Prezidente Nicolau Lobato, povu sira ho emosaun ho matan-been simu Saudozu Francisco Guterres Lu-Olo neebe mos hanesan Prezidente Partidu FRETILIN neebe akompanha iha Hospital Price Court iha Kuala Lumpur, Malazia too matebian iis kotu iha tuku 22:00 Oras Malazia, Domingu 21 Juni tinan nee.
Entretantu iha dalan estudante ho kunidade sira kontinua forma no hein hodi hatoo sira nia kondolensia ba Saudozu Francisco Guterres Lu-Olo. Funsionariu publiku no autoridade lokal sira forma mos iha dalan hodi hatudu sira nia domin no respeitu ba maktoban hanesan eroi no lider nasional neebe kontribui ba Timor Leste nia luta ba indepensia too ukun aan no kontinua kontribui iha faze liberta povu husi mukit no kiak.
Iha situasun tristeza nee lori saudozu no lakon boot laos ba familia deit, maibe ba nasaun no povu, Saudazo Francisco Guterres hadomi hodi servi dezde luta ba independensia too ukun rasik aan hodi asume mos kargu importante sira hanesan Prezidente nasional too kargu ikus liu hanesan Prezidente Republika.
Too iha maktoban nia rezidensia Farol, Dili, simu ho liafuan benvindu husi nia alin Domingos Guterres hodi hamulak tuir lisan no ritual neebe iha molok hodi simu Saudozu Francisco Guterres Lu-Olo tama ba uma laran hodi tau iha fatin neebe familia ho Governu prepara ona.
(jen)
