DILI, STLTIMORLESTE.com – Prezidente Republika (PR), Jose Ramos Horta hatete, sente tiste bainhira simu informasaun katak Eis Prezidente Francisco Guterres Lu Olo hakotu vida, hodi fila hikas ba Nai nia kadunan Santo. Ohin PR orienta onaaviaun Aero Dili aranka kedas ba Kuala Lumpur hodi kadaver mate Eis Prezidente mai Timor Leste (TL).
Prezidente Republika Jose Ramos Horta hatoo sentimentu triste ba STL via WhatsApp, Segunda (22/06/2026) hatete, ohin kedas aviaun Aero Dili aranka ba Kuala Lumpur hodi tula kadaver saudozu Francisco Guterres Lu Olo iha Hospital Prince Court, Kuala Lumpur, Malazia.
“Aviaun Aero Dili aranka ohin kedas ba Kuala Lumpur ba tula Prezidente LuOlo nia isin,” dehan Prezidente Republika Jose Ramos Horta.
Prezidente Republika seste sente tanba TL lakon lider luta nain ida neebe la sente kolen hodi luta 24 anos hodi lori rai nee ba hetan ukun rasik aan, maibe ohin nia fila hikas ona ba Nai nia kadunan Santo rohan laek nia.
“Hau simu informasaun konaba eis Prezidente Lu-Olo iis kotu, hau tristi los, lakon boot ba ita nia nasaun. Prezidente Lú-Olo halo parte jerasaun funu nain tinan 24 nia laran, líder FRETILIN tinan 20 resin, Prezidente Assembleia konstituinte, Prezidente Parlamentu Nasional (PN), Prezidente Republika. Wainhira iha Malazia hau ba hospital vizita Prezidente baixa iha nee ba, iha hela ICU. Tan nee la bele tama. Maibe hau tuur koalia ho nia espoza Primera Dama Cidalia, rona informasaun status kliniku Prezidente Lu Olo nian,” dehan PR Horta.
Iha biban nee Prezidente Republika hatoo sentidu kondolensia ho fuan no laran triste ba familia liu liu feen no oan kiak, lideres, membru partidu FRETILIN, neebe lakon ema diak ida iha nasaun nee.
“Ba família, ba Ama Cidalia no oan sira, líderes no membru partido Fretilin hau aprezenta kondolensias ho fuan, ho laran. Aviaun Aero Dili aranka ohin kedas ba KL ba tula Prezidente Lu Olo nia isin,” katak PR Horta.
Aleinde nee Prezidente Republika (PR), Jose Ramos Horta konsidera eis Prezidente Republika Francisco Guterres Lu-Olo nia mate hanesan lakon boot ida ba povu Timor Leste. lori tristeza boot ida ba povu Timor Leste, tanba lakon ona eroi nasional ida neebe dIdika nia aan tomak iha prosesu luta ba ukun rasik aan inklui iha prosesu dezenvolvementu nasaun nian.
Horta konta katak foin, lalais nee halo vizita estadu ba Malazia iha loron 13 to 16 Junhu, vizita mos Lu-Olo iha sala kuidadu intensivu. tuir informasaun neebe doutor espesialista ida aprezenta ba espoza Cidalia Lopes Nobre Mouzinho Guterres katak kondisaun lider nasional nee hahu grave.
“Hau hetan informasaun katak kondisaun kliniku Prezidente Francisco Guterres Lu-Olo grave tebes. Tanba respeitu ba privasidade pasiente no família, bainhira fila mai Díli, hau deit hatete ba jornalista sira katak hau ba ospital atu hatene kona-ba estadu saude ex-Prezidente Republika Dr. Francisco Guterres Lu-Olo, la fo detallu kona-ba nia kondisaun kliniku,” dehan nia.
Horta akresenta liu tan katak, eis Prezidente Francisco Guterres Lu-Olo mak patriota boot ida, ida husi lider sentral sira iha luta libertasaun, lider husi partidu istoriku FRETILIN, no mos halo ona knaar aas hotu iha Estadu.
Nia mos reforsa katak, kontaktu ona Embaixador Timor-Leste iha Malazia atu koordena asaun nesesariu hotu, hamutuk ho familia no estrutura Estadu sira, atu lori mate isin mai Timor-Leste.
“Hanesan mos, hau kontaktu ona AERODILI atu prepara vook especial ida ba transporta mate isin no membru familia sira. Prezidensia Republika, iha koordenasaun ho orgaun Estadu seluk sira, sei fo apoiu tomak no onra Estadu tomak ba Prezidente Francisco Guterres Lu-Olo,” nia sublina.
Eis PR Lu Olo mate ohin iha Hospital Prince Court, iha Kuala Lumpur, ho tinan 71, hafoin halao tratamentu intensivu. Entretantu Francisco Guterres “Lu-Olo”, Moris iha Ossu, Distrito Viqueque, iha 7 Setembru 1954.
Lu-Olo kaben ho Cidalia Lopes Nobre Mouzinho Guterres, no sira iha oan nain-haat, Francisco Cidalino, Eldino Nobre, Felezito Samora Guterres no Dalia Luliana Nobre Guterres.
(eme)
