DILI, STLTIMORLESTE.com – Prezidente Repúblika (PR), José Ramos-Horta halo enkontru ho Koordenadora ONU iha Timor-Leste, Funmi Balogun, hodi diskute prioridade Timor-Leste nian ba Asembleia Jerál ONU.
Enkontru ne’e realiza iha Palásiu Prezidensiál Nicolau Lobato, Bairru Pite, Dili, Kuarta (16/09/2026).
Koordenadora ONU iha Timor-Leste, Funmi Balogun, ba Jornalista hatete katak nia mai hasoru Prezidente Repúblika atu diskute misaun ne’ebé sei hala’o iha Asembleia Jerál ONU.
“Mai hasoru malu ho Sua Exelénsia, Prezidente, atu diskute misaun ne’ebé sei mai iha Asembleia Jerál ONU nian,” Funmi Balogun hatete.
Nia esplika katak diskusaun ho Prezidente Horta inklui prioridade Sekretáriu Jerál ONU kona-ba mudansa klimátika, tranzisaun justu no reforma ONU ne’ebé la’o hela.
Funmi Balogun mós hatete katak, Prezidente Repúblika sei partisipa iha enkontru nivel aas kona-ba mudansa klimátika iha Nova Iorke, ne’ebé sei hala’o iha tempu oin mai.
Nia hatete, enkontru ne’e importante atu fó informasaun ba Prezidente kona-ba mensajen sira relasiona ho mudansa klimátika, reziliénsia no serbisu ne’ebé Timor-Leste halo ona.
Asembleia Jerál ONU nu’udar forúm internasionál ne’ebé reúnu Estadu-Membru sira atu diskute kestaun globál no prioridade dezenvolvimentu. Enkontru entre Prezidente Horta no Koordenadora ONU ne’e mosu iha preparasaun ba partisipasaun Timor-Leste iha enkontru internasionál sira.
Alende nia hatutan tan katak ONU apoia Timor-Leste iha dezenvolvimentu reziliente ba mudansa klimátika, inklui ekipamentu meteorolójiku no infraestrutura komunidade nian.
Nia esplika katak, ekipamentu meteorolójiku sira ne’e sei ajuda fó previzaun tempu no mudansa klimátika ne’ebé di’ak liután, nune’e agrikultór no komunidade sira bele halo planu apropriadu.
“Bainhira ita ko’alia kona-ba previzaun di’ak liu, ida-ne’e signifika katak agrikultór sira no komunidade sira bele hatene kona-ba mudansa klimátika no bele halo planu,” Funmi Balogun hatete.
Nia mós hatete katak, Programa Nasoins Unidas ba Dezenvolvimentu (UNDP) apoia infraestrutura reziliente ba klima iha munisípiu sira, atu ajuda komunidade harii uma, ambiente no estrada sira ne’ebé tahan liután hasoru impaktu mudansa klimátika.
Aleinde ne’e, Organizasaun Nasoins Unidas ba Agrikultura no Alimentasaun (FAO) apoia agrikultór feto sira ho teknolojia no fini oioin ne’ebé bele tahan kondisaun klima, inklui tempu rai-maran.
ONU nia apoiu ba Timor-Leste inklui programa sira iha área meteorolojia, agrikultura no infraestrutura. Programa sira ne’e iha objetivu atu aumenta komunidade nia reziliénsia no ajuda agrikultór sira adapta ba impaktu mudansa klimátika.
Iha biban ne’e Prezidente Republika, José Ramos-Horta hatete, hato’o bemvindo ba Koordenadora ONU iha Timor-Leste, Funmi Balogun, diskute prioridade Timor-Leste nian ba Asembleia Jerál ONU mai iha Palasiu Prezidensial hodi deskute hamutuk konaba asembleia jeral ONU nomos mudansa klimatika.
(eme)
