DILI, STLTIMORLESTE.com – Prezidente Republika (PR), Jose Ramos Horta simu BRI Timor Leste ho laran luak sai nuudar Patrosinador Prata ba edisaun ba dala 10 neebe istoriku husi Maratona Internasional Dili (MID).
Komite Organizador Maratona Internasional Dili 2026 ho ksolok konfirma BRI Timor-Leste nuudar Patrosinador Prata ba eventu tinan ida nee, hodi aumenta apoiu importante husi setor privadu ba plataforma desportiva internasional neebe vizível liu iha Timor-Leste.
Parseria nee lori BRI Timor-Leste tama ba grupu instituisaun sira neebe apoia edisaun ba dala 10 husi Maratona Internasional Dili, neebe sei akontese iha loron 8 Agostu 2026 iha Díli. Konesidu luan nuudar eventu halai internasional prinsipal iha Timor-Leste, maratona nee espera atu atrai partisipante liu nain 5.000 husi nasaun 30 resin ba perikursu ida neebe sertifikadu husi World Athletics no hetan akreditasaun husi AIMS iha tasi-ibun sidade kapital nian.
Laos deit atu apoia atividade loron kompetisaun nian, patrosíniu BRI Timor Leste nian kontribui mos ba realizasaun eventu luan ida neebe promove saude publika, desportu, turizmu, partisipasaun komunitaria, no imajen internasional Timor-Leste nian. Edisaun 2026 nee organiza husi Federação de Timor-Leste de Atletismo (FTA) sob patrosíniu husi Prezidente Jose Ramos-Horta no lori tema “Hadomi Ita-nia Ai laran no Animal Fuik sira.”
Programa eventu ba tinan ida nee inklui kategoria halai haat, Maratona Kompleta – 42.195 km, Meia-Maratona – 21.1 km, Eventu Para-Atleta sira – 10 km, Halai Ksolok (Fun Run) – 5 km.
Kompetisaun 2026 nian mos sei aprezenta melloria profisional oioin ba eventu nee, inklui teknolojia kronometrajen eletroniku MYLAPS, medisaun perikursu ho akreditasaun internasional, no foku neebe metin liu ba preparasaun atleta sira no aprezentasaun eventu.
Maratona Internasional Dili kontinua buras laos deit nuudar eventu desportivu, maibe mos nuudar plataforma nasional ida neebe halibur atleta de elite sira, halai nain rekreasional sira, parseiru dezenvolvimentu sira, patrosinador sira, media, voluntariu sira, no publiku em jeral. Apoiu husi parseiru komersial no institusional sira nafatin esensial atu garante katak eventu nee realiza ho profisional no asesível ba partisipante sira husi Timor-Leste no rai-liur.
Hodi hola parte nuudar Patrosinador Prata, BRI Timor-Leste fo apoiu ba eventu ida neebe reflete enerjia, dixiplina, inkluzaun, no optimizmu valor sira neebe alina besik ho espíritu maratona nian no ambisaun desportiva Timor-Leste nian neebe buras dadaun.
Prezidente Republika Jose Ramos Horta, nuudar Patronu ba Maratona Internasional Dili 2026 nia naran, Komite Organizador simu BRI TL ho laran nuudar patrosinador prata ba Maratona Internsional Dili.
“Ami simu ho laran luak BRI Timor-Leste nuudar Patrosinador Prata ba Maratona Internasional Dili 2026. Parseria metin ho setor privadu mak esensial ba susesu iha prazu naruk ba eventu boot sira hanesan nee, no apoiu husi BRI Timor-Leste sai nuudar kontribuisaun folin boot ida ba kresimentu kontinua husi maratona nee. Maratona Internasional Dili laos deit kompetisaun halai ida, ida-nee mak selebrasaun ida ba saude, komunidade, orgullu nasional, no fatin Timor-Leste nian iha palku internasional. Ami agradese ba BRI Timor-Leste tanba hola parte iha esforsu nee.” dehan PR Ramos Horta liu husi Komunikadu Neebe STL asesu husi media PR, Sesta (17/07/2026).
Nunee mos Jerente Jeral BRI Timor-Leste nian, Ahmad Zaky hatete BRI TL sente ondradu hodi apoiu eventu desportiva Internasional liu husi Maratona Internasional Dili.
“BRI Timor-Leste (BRITL) sente onradu atu apoia eventu desportivu internasional neebe prestijiozu liu iha Timor-Leste. Ami haree Maratona Internasional Dili nuudar eventu importante ida neebe halibur ema husi nasaun, kultura, no orijen oioin no iha tempu hanesan kontribui ba turizmu, negosiu lokal sira, no perfíl internasional nasaun nian. Liuhusi parseria nee, ami reafirma ami-nia kompromisu atu sai parseiru bankariu fiar-metin ida neebe apoia progresu no dezenvolvimentu Timor-Leste nian.” dehan nia.
Durante tinan barak nia laran, Maratona Internasional Dili sai ona nuudar eventu anual prinsipal ida Timor-Leste nian, hodi ajuda atu projeta laran-luak, ospitalidade, no kapasidade organizasional nasaun nian ba audiensia internasional neebe kontinua aumenta. Edisaun 2026 sai signifikativu liu tanba eventu nee atinji too nia edisaun dalan ba 10, marka importante ida neebe reflete kontinuídade no ambisaun.
Ho apoiu husi parseiru sira hanesan BRI Timor-Leste, maratona tinan ida nee iha objetivu atu oferese esperiensia neebe forte liutan ba atleta, apoiante, no publiku sira, hodi kontinua harii perfíl Timor-Leste nian nuudar destinu ida ba desportu no turizmu internasional.
Anunsiu seluk tan konaba parseiru eventu nian, preparasaun atleta sira, no atividade sira iha semana kompetisaun nian sei fo sai molok too fulan Agostu.
(eme)
