DILI, STLTIMORLESTE.com — CEO Banku Kaebauk, Anjelho Soares hato’o vizaun, misaun no kompromisu banku nian ba Prezidente Repúblika (PR), José Ramos-Horta.
Anjelho Soares halo enkontru ho Prezidente Repúblika iha Palásiu Prezidensiál Nicolau Lobato, Bairo Pite, Dili, Kuarta-feira (30/09/2026).
Enkontru ne’e atu hato’o vizaun no misaun Banku Kaebauk, nu’udar banku komersiál privadu foun ne’ebé foka ba servisu asesível, konfiável no responsavel.
“Objetivu primeiru ami mai hasoru Prezidente mak hato’o vizaun no kompromisu Kaebauk nu’udar banku komersiál privadu foun iha Timor-Leste,” dehan CEO Kaebauk.
Anjelho hatete, ekipa lideransa Banku Kaebauk mós konvida ofisialmente Prezidente Repúblika atu partisipa iha serimónia lansamentu, ne’ebé sei realiza iha 23 Outubru 2026.
Prezidente José Ramos-Horta simu konvite husi lideransa Banku Kaebauk no hatete katak nia tau ona eventu lansamentu ne’e iha ninia ajenda.
Alende serimónia lansamentu, Banku Kaebauk sei hahú ofisialmente ninia servisu ba kliente no públiku iha Timor-Leste, hahú 26 Outubru 2026.
CEO Kaebauk hatete, instituisaun sei kontinua fó atensaun boot ba mikrokréditu, ne’ebé sai parte importante husi misaun no negósiu prinsipal banku nian.
“Kaebauk sei kontinua foka maka’as ba mikrokréditu, tanba ida ne’e mak negósiu prinsipal no parte importante husi ami nia misaun,” dehan.
(eme)
