DILI, STLTIMORLESTE.com – Prezidente Republika (PR), Jose Ramos Horta vizita servisu ba Vietnam, hodi partisipa forum Futuru ASEAN 2025.
Iha loron Segunda nee (24/02/2025 ) Prezidente Republika, Jose Ramos Horta hahu ona ninia vizita servisu ba Vietnam husi loron 24-26 fulan Fevereiru tinan 2025, hodi partisipa iha Forum Futuru ASEAN 2025. Forum nee, ho tema harii ASEAN neebe Unidu, Inkluzivu no Reziliente iha Transformasaun Global sira nia leet, halibur líder rejional sira atu diskute kona-ba futuru ASEAN nian no responde ba dezafiu xave sira neebe rejiaun hasoru.
Durante ninia vizita servisu, Prezidente Ramos Horta sei halao enkontru bilateral nivel aas ho lideransa Vietnam nian, inklui Sua Exelensia Luong Cuong, Prezidente Vietnam, no Sua ExelensiaTo Lam, Sekretariu Jeral Partidu Komunista Vietnam nian. Enkontru hirak nee sei hametin ligasaun diplomatika entre Timor Leste no Vietnam, no sei avansa diskusaun kona-ba kooperasaun no dezenvolvimentu rejional.
Iha Forum Futuru ASEAN nian, Prezidente Ramos Horta sei hatoo diskursu prinsipal iha serimonia abertura Forum nian no partisipa iha sesaun Q&A nivel aas hamutuk ho Primeiru Ministru Vietnam nian, S.E. Pham Minh Chinh, Primeiru Ministru Malazia nian, Rt. Hon. Dato Seri Anwar bin Ibrahim, no Primeiru Ministru Nova Zelandia, Rt. Hon. Christopher Luxon
Forum Futuru ASEAN 2025 serve hanesan plataforma signifikativu ida ba dialogu rejional kona-ba asuntu krítiku sira inklui avansu teknolojiku, seguransa abranjente, no papel ASEAN nian iha paizajen global ida neebe kompleksu ba beibeik.
Partisipasaun Timor Leste nian iha Forum nee sublina ninia kompromisu ba integrasaun rejional no ninia viajen lao hela ba adezaun ba ASEAN. Nasaun kontinua halo progresu signifikativu iha prosesu adezaun.
PR Horta dehan, Forum Futuru ASEAN reprezenta plataforma importante ba dialogu no kolaborasaun hanesan servisu hamutuk atu harii Sudeste Aziatiku neebe integra no reziliente liu.
“Partisipasaun Timor Leste nian refleta ami nia kompromisu metin ba kooperasaun rejional no ami nia prontidaun atu kontribui ho signifikativu ba vizaun komun ASEAN nian ba dezenvolvimentu sustentavel no prosperidade. Hanesan ami progresu iha ami nia viajen adezaun ba ASEAN, ami hakarak servisu besik ho ami nia vizinu sira atu rezolve dezafiu komun no kaer oportunidade sira ba kresimentu koletivu,” Katak PR Horta.
PR dehan, nuudar nasaun neebe kompromete ba dezenvolvimentu sustentavel no kooperasaun rejional neebe aumenta, Timor Leste hakarak kontribui ba diskusaun sira kona-ba mudansa klimatika, tranzisaun enerjia no hametin reziliente rejional liu husi asaun koletivu no kolaborasaun.
Prezidente nia delegasaun inklui ofisial superior sira governu nian husi Ministeriu Negosiu Estranjeiru no Kooperasaun, neebe hatudu Timor Leste nia kompromisu makaas atu envolve ho parseiru rejional sira no kontribui ba vizaun kompartillada ASEAN nian ba futuru.
(eme)
