DILI, STLTIMORLESTE.com – Restu mortál Preladu Katóliku na’in tolu (3), Bispu Jaime Garcia Goulart, Bispu José Joaquim Ribeiro no Monsenhor Martinho da Costa Lopes, to’o ona iha Aeroportu Internasionál Prezidente Nicolau Lobato, Dili, iha Tersa, 1 Setembru 2026, atu hamutuk ho restu mortál Bispu Alberto Ricardo da Silva iha programa komemorasaun nasionál no relijioza.
Governu Repúblika Demokrátika Timor-Leste (RDTL) no Konferénsia Episkopál Timorense (KET) organiza serimónia ofisiál simu no fó omenajen ba Preladu na’in haat, nu’udar forma ida hodi rekoñese sira-nia servisu pastorál, sakrifísiu no kontribuisaun ba Igreja Katólika, povu no istória Timor-Leste.
Restu mortál Bispu Jaime Garcia Goulart, Bispu José Joaquim Ribeiro no Monsenhor Martinho da Costa Lopes translada hosi Portugal mai Timor-Leste, enkuantu restu mortál Bispu Alberto Ricardo da Silva translada hosi Rate-Maloa, Dili. Restu mortál na’in haat sei hamutuk iha programa komemorasaun no sei hakoi iha Katedrál Dili.
Tuir programa ofisiál, restu mortál Preladu na’in tolu hosi Portugal to’o iha aeroportu tuku 13h30. Komisaun Organizadora Governu hamutuk ho povu Timor-Leste simu sira ho parada militár antes transporte restu mortál ba fatin serimónia.
Iha serimónia ne’e, sei hala’o mós asinatura dokumentu entrega restu mortál entre Komisaun Organizadora Governu no Konferénsia Episkopál Timorense. Depois, sei iha liafuan badak hosi reprezentante Governu no KET, antes restu mortál sira transporta hosi aeroportu ba Esplanada Tasi Tolu.
Programa komemorasaun ne’e uza lema “Retratu sira Fiar nian no Memória Eterna Igreja nian no Timor-Leste nian: Selebra Patrimóniu no Sakrifísiu Ita-nia Preladu Doben sira-nian”, hodi fó énfaze ba legadu espirituál, istóriku no nasionál Preladu na’in haat.
Programa sei kontinua iha 3 Setembru iha Manatuto, ho omenajen espesiál ba Monsenhor Martinho da Costa Lopes. Iha serimónia ne’e, Governu sei fó naran Ponte Manatuto tuir naran Monsenhor Martinho da Costa Lopes, ho inaugurasaun plaka komemorativa no bênsaun ponte. Prezidente Repúblika José Ramos-Horta sei halo intervensaun iha eventu ne’e.
Monsenhor Martinho da Costa Lopes sai figura importante iha istória Timor-Leste tanba nia defende direitu, dignidade no interese povu Timoroan, no hato’o sofrimentu povu ba públiku internasionál durante períodu okupasaun.
Serimónia komemorasaun sei atinji pontu ikus iha 10 Setembru, iha Tasi Tolu no Katedrál Dili, ho Missa Omenajen, intervensaun hosi lideransa Igreja no Prezidente Repúblika, no serimónia hakoi restu mortál Preladu na’in haat iha Katedrál Dili.
Bispo Jaime Garcia Goulart, nu’udar Bispo dahuluk Diocese Dili, iha papel importante iha dezenvolvimentu misaun Igreja Katólika iha Timor, inklui área edukasaun, formasaun no vida pastorál.
Bispo José Joaquim Ribeiro, nu’udar sucessór Bispo Jaime Garcia Goulart, lidera Diocese Dili hosi 1967 to’o 1977, períodu ne’ebé Timor-Leste hasoru krize polítiku no konflitu armadu.
Monsenhor Martinho da Costa Lopes, nu’udar Administradór Apostóliku Diocese Dili, sai voz importante ida iha defesa direitu no dignidade povu Timoroan durante okupasaun, liuhosi nia testemuñu no pozisaun pastorál.
Enkuantu Bispu Alberto Ricardo da Silva, nu’udar Bispu Dili hosi 2004 to’o 2015, kontinua misaun pastorál Igreja iha períodu Timor-Leste hanesan Estadu independente.
Governu no Igreja Katólika konsidera transladasaun restu mortál Preladu na’in haat nu’udar momentu importante atu haktuir memória no rekoñese sira-nia kontribuisaun ba formasaun Igreja, defesa dignidade umana no dezenvolvimentu identidade nasionál.
Ho programa komemorasaun ne’e, memória, fiar, sakrifísiu no servisu Preladu na’in haat sei kontinua moris iha memória povu Timoroan no sai patrimóniu istóriku no espirituál ba jerasaun agora no futuru.
(eme)
