DÍLI, STLTIMORLESTE.com – Ministériu Juventude, Desportu, Arte no Kultura (MJDAC) sei realiza atividade oioin iha selebrasaun Loron Nasionál Juventude no komemorasaun Masakre Santa Cruz 2026, ho sentru selebrasaun nasional iha Munisípiu Manatuto.
Atividade prinsipal sira inklui semináriu, feira, reflexão, misa no serimónia kari ai-funan, ne’ebé sei hala’o iha postu administrativu hotu-hotu iha territóriu nasional.
Diretór Nasionál ba Dezenvolvimentu Juventude iha MJDAC, João Lemos, hateten informasaun ne’e ba jornalista STL iha kuarta-feira, 4 Novembru 2026.
Nia esplika katak, atividade sira ne’e mak programa prinsipal ba selebrasaun nasional, inklui mós atividade adisionál ne’ebé autoridade Munisípiu Manatuto prepara rasik.
Konaba konvidadu sira, João Lemos hateten katak organizadór sei konvida lideransa nasional, veteranu no jerasaun 12 Novembru, inklui mós jovem sira ne’ebé iha ona esperiénsia iha atividade produtiva no kreativa.
Nia afirma katak, objetivu mak fó oportunidade ba joven sira atu fahe esperiénsia no koñesimentu ba sira-nia maluk, kona-ba kontribuisaun juventude iha prosesu dezenvolvimentu nasaun.
Joven sira ne’ebé iha esperiénsia no kreatividade iha sira-nia komunidade sei hetan oportunidade atu promove sira-nia atividade no inspira jerasaun foun atu kontribui ba dezenvolvimentu Timor-Leste.
Aleinde ne’e, organizadór mós sei konvida Prezidente Repúblika, Primeiro-Ministru, membru Governu no entidade relevante sira atu partisipa iha selebrasaun nasional iha Munisípiu Manatuto, tuir disponibilidade autoridade sira.
João Lemos hatutan katak, depois programa nasional ne’e prepara ona, responsabilidade atu organiza no mobiliza atividade sira iha Munisípiu Manatuto sei entrega ba autoridade munisipál atu hala’o tuir planu ne’ebé iha.
(leo)
