DILI, STLTIMORLESTE.com – Produtu programa merenda eskolar iha eskola balun iha Munisípiu Bobonaro hetan problema, tanba produtu balun dodok no dois, ne’ebé bele afeta implementasaun programa merenda eskolar.
Xefi Departamentu Programa Merenda Eskolar iha Ministériu Edukasaun (ME), Belchior Maria Almeida Barros, hato’o informasaun ne’e ba STL iha nia fatin servisu, Kuarta-feira (16/09/2026).
“Los duni, hau simu informasaun husi Kordenador Munisípiu Bobonaro dehan katak akontese duni hanesan ne’e. Autoridade Munisípiu Bobonaro halo ona kontratu ho Koperativa MOKATIL, nu’udar fornesedór ba Programa Merenda Eskolar (PME) ba tinan nee. Maibé iha falhas iha fornesimentu ai-han ba eskola sira, hanesan entrega tarde, kuantidade ai-han la to’o no produtu balun dodok no dois. Situasaun nee bele prejudika implementasaun PME iha Bobonaro,” nia informa.
Tuir Belchior, informasaun kona-ba problema ne’e hatete ona ba autoridade Munisípiu Bobonaro, hodi bolu ho urjénsia Koperativa MOKATIL atu responsabiliza ba atrasu no problema iha fornesimentu. Maibé, programa merenda eskolar iha Bobonaro kontinua hela.Informasaun konaba estudantes nain rua fahe manu tolun ida iha eskola Munisipiu Baucau,ba asuntu nee ninia parte seidauk simu informasaun.
Iha parte seluk, Diretór Servisu Edukasaun Munisípiu Bobonaro, Miguel Freitas, hatete katak implementasaun merenda eskolar iha eskola balun lao hela, maibé iha eskola balun seidauk lao. Nia subliña katak programa la paradu hotu, maibé iha eskola rua hetan problema produtu dodok no dois.
Nia hatete katak, eskola sira simu ona orientasaun atu troka produtu ne’ebé la diak ho produtu foun, inklui manu-tolun, naan manu no naan karau.
“Ohin hau konfirma, no husi PDHJ mós mai iha ne’e. MOKATIL mós mai fó sira nia razaun katak karau nee oho iha uma iha oras tarde, no depois mak halo distribuisaun. Maibé sira ladún antisipa atu rai produtu nee ho diak, rai deit iha li’ur, ne’ebé halo naan nee dois uituan. Nee akontese iha eskola rua, EBC Vítor Santa no EBC Maliana,” nia dehan.
Miguel hatutan katak, tuir informasaun ne’ebé simu, eskola balun seidauk tein tanba ai-han ba merenda eskolar la kompletu. Maibé, iha eskola seluk, implementasaun merenda eskolar lao hanesan bai-bain.
Nia husu ba eskola no fornesedór sira atu fó atensaun ba kualidade produtu, hodi garante katak estudante sira hetan nutrisaun ne’ebé diak.
“Eskola ida-idak presiza haree asuntu ida nee ho diak, liu-liu fornesedór sira tenke prepara ai-han ne’ebé diak ba estudante sira, atu nune’e bele fó nutrisaun ne’ebé diak ba estudante sira iha eskola ida-idak,” nia dehan.
Miguel mós fó hanoin ba eskola sira ne’ebé merenda eskolar lao hela atu nafatin prepara produtu ne’ebé diak, tanba iha eskola balun programa nee seidauk lao no iha balun lao hela.
Enkuantu, Diretór Servisu Edukasaun Munisípiu Manatuto, Luis Antonio Soares, hatete katak programa merenda eskolar iha eskola sira iha Manatuto lao hanesan bai-bain, no menu jere tuir orientasaun no menu ne’ebé iha ona.
“Programa merenda eskolar iha eskola sira lao hanesan bai-bain. Estudante sira asesu ba programa nee mós lao diak hanesan bai-bain,” nia informa.
(jac)
