BAUCAU, STLTIMORLESTE.com – Projetu Reabilitasaun Estrada Urbana Baucau Vila ne’ebé implementa husi kompaña JOVA Construction Unipessoal Lda, atualmente progresu fiziku atinji ona 24,47%.
Projetu reabilitasaun estrada urbana Baucau Vila fahe ba pakote rua, pakote dahuluk, kobre husi área Nagardjo to’o Hospitál Rejionál Eduardo Ximenes (HoREX), kilomentru 2.880 metru, ho kontratu númeru SSS/007/MOP–2026 ba durasaun servisu fulan 24 implementa ho valór orsamentu hamutuk US$4,735,021.55.
Projetu refere ofisialmente lansa fatuk dahuluk iha loron 06 Fevereiru 2026, husi Primeiru Ministru Kay Rala Xanana Gusmão, ne’ebé hetan akompaña husi Ministériu Obras Públikas, Autoridade Munisípal Baucau no entidades seluk tán, iha ne’ebé parte kompaña mobiliza kedas ekipamentus pezadu iha terrenu implementa projetu refere.
“To’o iha 31 Agostu 2026, progresu fiziku obra ne’e atinji 24,47%, enkuantu progresu planeadu iha períodu ne’e 8,63%, ho progresu efetivu iha terrenu kontinua hala’o iha vários pontu, diferensa pozisaun 15,85,” hatete Projetc Manager Dionisius Sutyas Pratomo ba STL iha Nagardjo, Kuarta (01/09/2026).
Tuir Projetc Manager ne’e, obra ne’ebé atualmente la’o iha terrenu inklui konstrusaun RCPC no trotoar ne’ebé hahú husi STA 0 to’o STA 800 iha parte esquerda, no relokasaun tubu bee (pipah) husi STA 300 to’o STA 2+280 iha parte esquerda.
Aliende mós ekipa konstrusaun kontinua kontinua la’o ho atividade infiltrasaun no servisu box culvert iha área projetu.
Maski nune’e, servisu iha parte final projetu, liuliu husi STA 2+300 to’o STA 2+880 área Hospitál Rejionál Eduardo Ximenes nian seidauk bele la’o ho normal, tanba seidauk kompleta proses relokasaun infraestrutura existente, hanesan presiza reloka tubu bee kuaze metru 700, no mós poste eletrisidade hamutuk unidade haat ne’ebé presiza relokasaun.
“Se pipa no poste eletrisidade ne’e reloka hotu ona ami bele kontinua servisu normal. Ba largura hotu ona tuir estrada nia medida, maibé iha uma balu sei hein demolisaun,” Dionisius dehan.
Parte kompaña JOVA Constraction sei termina projetu refere tuir kontratu ne’ebé selebra ona, maibé atualmente fó impaktu ba progresu servisu iha terrenu mak, iha uma komunidade hamutuk haat ne’ebé afeta ba alargamentu estrada, maibé seidauk sobu, tanba sei hein hela prosesu idemnizasaun husi Ministériu Obras Públikas.
(tom)
