QUELICAI, STLTIMORLESTE.com — Projetu konstrusaun Sala Maternidade iha Postu Administrativu Quelicai, Munisípiu Baucau, foin atinji 60%, maski tuir planu inisiál tenke remata iha Setembru 2026. Kompaña Jonafa Unipessoal, Lda. hetan estensaun tanba atrasu ne’ebé, tuir kompaña, kauza husi udan no problema sosial.
Tékniku Jonafa Unipessoal, Lda., Joni da Silva, hateten katak konstrusaun ne’e hahú iha fulan Maiu 2026 ho alvu atu remata iha Setembru. Maibé, to’o Setembru, servisu foin to’o 60% no presiza aumenta tan tempu fulan rua atu kompleta projetu.
“Nia progresu agora sa’e ona ba 60%. Tuir loloos tenke termina iha fulan Setembru ne’e, maibé agora aumenta tan fulan rua, tanba udan no problema sosial sira ne’e mak halo tarde,” hateten Joni da Silva ba STL iha fatin konstrusaun Sala Maternidade Quelicai, Segunda (28/09/2026).
Joni esplika katak kompaña kompleta ona balu husi servisu prinsipál, inklui taka kalen no reboka parede. Agora traballadór sira kontinua servisu iha plafond no prepara atu tama ba faze instalasaun azuleju, odamatan, janela, fiu eletrisidade no pintura.
Projetu ne’e iha medida 26 x 8 metru, ho kuartu 10 resin. Tuir estensaun kontratu ne’ebé halo ona, kompaña planeia finaliza konstrusaun iha Novembru 2026.
“Ami promete sei servisu maka’as atu finaliza iha fulan Novembru ne’e nia laran,” Joni hateten.
Problema Sosial Rezolve Ona
Iha sorin seluk, Xefe Sentru Saúde Quelicai, Domingos Boavida, konfirma katak tuir relatóriu progresu ne’ebé Sentru Saúde simu husi kompaña, konstrusaun atualmente atinji ona 60%.
Nia hateten servisu ne’ebé seidauk kompleta inklui instalasaun eletrisidade, bee moos, plafond, azuleju, odamatan no janela.
“Konstrusaun maternidade Quelicai loos duni iha dezentendimentu husi komunidade balu, maibé la fó impaktu tanba ita konsege rezolve hamutuk ho Autoridade no Seguransa PNTL. Nune’e, agora konstrusaun la’o nafatin no hein atu finaliza,” Domingos hateten.
Domingos rekoñese katak iha inísiu, kompaña aselera servisu konstrusaun, maibé impaktu husi problema sosial no kondisaun udan afeta ritmu servisu.
Maibé, liuhusi koordenasaun entre Autoridade Suku no Polísia Eskuadra Postu Quelicai, problema sosial sira ne’e rezolve ona no servisu konstrusaun kontinua.
Xefe Sentru Saúde Quelicai mós husu kompaña atu aselera tan servisu, tanba iha planu atu inaugura sala maternidade ne’e iha Janeiru 2027.
“Ita husu nafatin kompaña atu aselera, tanba bainhira sira ko’alia ona Janeiru 2027 tenke inagura, entaun antes to’o Janeiru ita ezije nafatin atu tenke hotu ona,” Domingos rekomenda.
Projetu konstrusaun Sala Maternidade Quelicai ne’e iha valór orsamentu US$198,671.12, ho finansiamentu husi United Nations Population Fund (UNFPA).
(tom)
