Ramos-Horta Hato’o Kondolénsia ba Família Palomita

DILI, STLTIMORLESTE.com – Prezidente Repúblika (PR), José Ramos-Horta hato’o kondolénsia no solidariedade ba família Palomita Gusmão Guterres, ne’ebé mate iha akontesimentu trájiku.

Iha karta ofisiál ne’ebé dirije ba família enlutada iha Matadoru, Suku Mascarenhas, Sabadu (21/11/2026), Prezidente espresa tristeza no konsternasaun tanba lakon vida joven ida-ne’e.

Nia reafirma mós solidariedade no proximidade ho família iha tempu susar ne’e, hodi fahe laran-moras ho família no komunidade.

“Liafuan ida mós labele kura tomak triste ka laran-moras ne’ebé mosu tanba akontesimentu ne’ebé derrepente tebes ida-ne’e,” afirma Prezidente.

Ramos-Horta apela ba autoridade judisiál no Polísia atu hala’o investigasaun ho rigor, dedikasaun no determinasaun, hodi apura faktu sira hotu no asegura justisa.

Nia subliña katak, prosesu legál tenke respeita memória Palomita, ninia família no prinsípiu Estadu Direitu.

Iha mensajen ikus, Xefe Estadu harohan ba Maromak atu fó deskansa eternu ba klamar Palomita nian, no fó forsa, korajen no dame ba família enlutada no ema hotu ne’ebé besik ba nia.

Deskansa iha pás.

(eme)

Share it :

Leave a Reply

Your email address will not be published. Required fields are marked *