DILI, STLTIMORLESTE.com – Rezistensia Nasional dos Estudantes de Timor Leste (RENETIL) realiza kongresu ba dala 9 ho tema “Refleta Pasadu, Afirma Pezente, Projeta Futuru”.
RENETIL realiza kongresu ba dala 9 ho tema “Refleta Pasadu, Afirma Pezente, Projeta Futuru” no subtema hakbiit konsiensia kritika iha prosesu konstrusaun estadu no transforma nasional nee halao iha salaun Unpaz, Dili.
Iha biban nee Xefe Estadu Maior Jeneral, FALINTIL-Forsa Defeza Timor Leste (F-FDTL), Jenente Jeneral Falur Rate Laek liu husi nia diskursu iha Salaun Unpaz, Sabadu (18/07/2026) hatete, agradese ba Prezidente RENETIL nomos ekipa neebe ho inisiativa bele realiza kongresu RENETIL ba dala 9.
“Ita boot sira realiza kongresu ho tema kritiku, hatene katak ita boot sira halo ona estudu profundu ba analiza perspektiva konaba ita nia situasaun jeral no partikular nee mak ita boot sira hola inisiativa ida nee nuudar jestu neebe ita boot sira sei la husik dever neebe ita boot sira kaer, kontinua ho kilat dever neebe ita boot sira kaer, tanba nee hau fo kontinensia ba ita boot sira hotu nia lealdade, honestidade, ba ita nia rai no povu Timor Leste,” dehan Xefe Estadu Maior Jeneral F-FDTL.
Jenente Jeneral Falur hatutan, dala ruma ema neebe luta nain hanesan membru RENETIL nomos ho luta nain seluk sama belar tiha fali idea luta libertasaun nasional, dala barak mos sama belar tiha valor no prinsipiu sira neebe sira rasik mak preve.
Tanba nee husu atu mantein sentidu responsabilidade no dever neebe halo hodi liberta povu no rai nee husi kiak no mukit.
Nunee mos Prezidente Konselhu Konseltivu RENETIL (CCR) Jose A.M. da Neves (Samalarua) hatoo benvindu ba parte hotu neebe mai partisipa kongresu RENETIL ba dala 9 iha tempu ida neebe RENETIL halo 38 anos ezistensia sai maduru no responsablidade liu tan.
“Agradese ba konvidadus hotu neebe ohin mai partisipa kongresu nee inklui organizasaun rezistensia lubuk ida neebe ohin iha nee, balun mai no balun la mai maibe ita nia relasaun no ita nia komunikasaun esensial nafatin importante iha momentu ida nee no iha momentu neebe ita harii iha okupasaun,” dehan Prezidente CCR.
Prezidente CCR hatete, kongresu ba dala 9 nee realiza iha momentu ida neebe Tmor Leste foin mak halo 24 anos restaurasaun indepedensia. 24 anos rezistensia 24 anos indepedensia, periodu boot rua nee idak idak ho nia faktus no narativas iha jornada politika Timor Leste nia.
Nunee mos Prezidente Komisaun Organizadors Domingos do Santos Caero (Lelo Aben) hatutan, agradese ba Maromak Kbiit Nain, tanba liu husi bensaun no protesaun bele halibur hamutuk hodi halao Kongresu Nasional RENETIL nian ba dala 9.
“Hodi Komisaun Organizadora tomak nia naran, hatoo benvindu no hatoo hau nia agradesimentu ba konvidadu, delegadu, membru, militante no simpatizante RENETIL nian tomak neebe mai partisipa iha eventu istoriku ida nee,” katak KO.
Nia hatete, Kongresu Nasional RENETIL ba dala 9 nee konvoka nuudar forum aas liu organizasaun nian atu halo reflesaun konaba RENETIL nia istoria no luta, avalia ninia estadu atual, no determina ninia diresaun no estratejia iha futuru.
Komisaun Organizadora ba Kongresu Nasional RENETIL ba dala 9 servisu ona liu husi prosesa preparasaun, koordenasaun no mobilizasaun rekursu hodi asegura ezekusaun programa kongresa tomak bo susesu. Iha prosesu nee tomak, komisaun nee responsavel ba dezenvolve konseitu, tema, ajenda, no mekanizmu operasional sira ba kongresu halo koordenasaun ho lideransa RENETIL, fundador sira, instituisaun estadu nian, universidade sira, parseiru dezenvolvimentu sira, no organizasaun sosiedade sivil sira prepara fatin, ekipamentu, hahan, transporte, akomodasaun, no rekizitu lojistiku sina.
Nunee mos tuir rejimentu Kongresu Nasional Renetil dala 9 tuir kapítulu I dispozisaun jeral artigu 1.° (Natureza) hatete katak kongresu nasional RENETIL ba dala 9 nuudar orgaun deliberativu aas liu organizasaun nian neebe halao periodikamente kada tinan haat tuir Estatutu Organiku RENETIL nian rejimentu ida nee regula lalaok, mekanizmu, prosedimentu no norma sira neebe orienta preparasaun no realizasaun Kongresu Nasional RENETIL ba dala 9.
(eme)
