DILI, STLTIMORLESTE.com — Oratório Dom Bosco São Pedro sai campeão Dom Bosco CUP 2026, depois vence Beto Tasi 3:2 iha penalti.
Final kompetisaun ne’e realiza iha Kampo Futebol Dom Bosco Comoro, Dili, Domingu (30/08/2026).
Iha primeira parte, ekipa rua hahu jogu ho intensidade aas, maibé la konsege kria golu.
Beto Tasi domina posse bola no kontrola ritmu jogu, maibé oportunidade sira ne’ebé kria la konsege transforma ba golu.
São Pedro, maski hetan presaun, organiza liña deféza no buka oportunidade liu husi kontra-atake.
To’o primeira parte remata, rezultadu nafatin 0-0.
Iha segunda parte, Beto Tasi kontinua domina posse bola no halo atake ba baliza São Pedro.
Maibé, finalizasaun Beto Tasi seidauk efetivu, nune’e ekipa ne’e la konsege muda rezultadu.
Iha minutu 34, jogador São Pedro hetan kartaun mean tanba halo falta, husi desizaun árbitru.
Beto Tasi hetan oportunidade husi suta livre iha área 12 metrus, maibé la konsege uza oportunidade ne’e.
Tempu regulár remata ho rezultadu 0-0, no árbitru aumenta tempu jogu tan 10 minutu.
Iha tempu adisionál, ekipa rua nafatin la konsege marca golu, nune’e desizaun tenki liu husi penalti.
Iha disputa penalti dahuluk, treinador ekipa rua hili jogador nain lima atu ezekuta penalti.
Jogador ekipa rua marka penalti nain haat, no rezultadu sai 2:2.
Disputa kontinua, jogador São Pedro konsege hatama penalti, enkuantu jogador Beto Tasi la konsege marca.
Ho rezultadu 3:2, Oratório Dom Bosco São Pedro sai campeão no konkista troféu Dom Bosco CUP 2026.
Final ne’e joga durante 40 minutu, fahe ba primeira no segunda parte, kada parte ho 20 minutu.
Kompetisaun ne’e envolve jogador sira ho idade entre 13 no 16 anos.
Final mos hetan apoiu husi apoiantes no espetadór sira husi ekipa rua, ne’ebé anima jogador durante jogu.
(leo)
