DILI, STLTIMORLESTE.com – Saudozu eis Prezidente Republika Francisco Guterres Lu Olo, nuudar eroi fiar nain, ezemplar iha familia, no aman luta nain ba rai ida nee, no simplisidade, no aman luta nain tanba husi sira nia sakrifisiu ohin loron ema hotu goja liberdade.
Lia hirak nee hatoo husi eis Xefe Kaza Sivil, Francisco Maria de Vasconcelos ba jornalista sira iha Farol, Tersa (23/06/2026) hatete, nia uluk servisu hamutuk nuudar Xefe Kaza Sivil hamutuk iha Prezidensia tuir nia haree saudozu Lu Olo ema ida neebe simplisidade, honestu no buat neebe los nia duru tebes.
“Prezidente ema ida simplisidade, simples tebes honestu, buat neebe los nia duru tebes, hau laos serbisu ho nia deit maibe hau aprende ho nia hanesan lider ida, hau admira tebes nia iha ai laran 24 anos nia mai bele halo adaptasaun neebe boot tebes konsege lidera ita nia rai husi asembleia konstituante mai restaura indepedensia too sai hanesan Prezidente Republika,” katak Eis Xefe Kaza.
Nunee mos oan daruak husi saudozu Lu Olo, Eldino Nobre, hatoo nia sentimentu triste no fuan moras tebes bainhira simu informasaun nia aman hakotu iis, sai hanesan momentu ida neebe susar no dolorozu tebes ba família tomak.
Saudozu nia oan hatete sente triste tanba lakon aman no lakon aimahon diak ida neebe durante nee sai mahon, orientador no ezemplu diak ba oan sira no família tomak.
“Aman sempre sai ezemplu diak ba ami hotu. Notísia ida nee halo ami triste no moras tebes,” dehan nia.
Nunee mos Reitor Universidade Dili (UNDIL), Jose Agostinho Belo, husu joven sira tenke aprende esperensia antigu Prezidente Republika, Francisco Guterres “Lu Olo”, tanba nia figura ida neebe maduru iha politika.
Reitor dehan Saudozu Lu Olo, hanesan figura ida neebe importante labele hetan iha universidade no fatin neebe deit, Lu Olo, hanesan lideransa politika neebe sempre foti desizaun ho rasional no responsabilidade ba nia desizaun tomak, durante nia mandatu tomak, husu partidu politiku sira tenke banati tuir Saudozu Lu Olo katak tenke rona ema kiik no boot, ida nee mak modelu ida importante.
(eme)
