DILI, STLTIMORLESTE.com – Saudozu eis Prezidente Republika, Francisco Guterres Lu Olo sei halot iha Jardim Heroi Metinaro, iha saudozu Mau-Huno no Saudozu Francisco Xavier nia klaran.
Veteranus, Cejar do Santos da Silva “Merak” ba jornalista sira iha Farol, Kuarta nee (24/06/2026) hatete, daudaun nee Governu ho familia deside ona saudozu eis Prezidente Republika Francisco Guterres Lu Olo sei halot iha Jardim Heroi Metinaro iha loron Sesta, 26 fulan Junhu, iha saudozu Mau-Hunu no Xavier nia klaran.
“Antes too prosesu funebre ami sei prosesu uluk ho sekuensia tuir mai mak hanesan, bainrua dader sei halo vizita sai husi rezidensia saudozu nia, sei ba Comite Central FRETILIN, depois sei ba Kuartel Jeneral F-FDTL Fatuhada, husi Fatuhada mak ami sei haree katak bele ba CCLN ka lae? pois sei haree portantu husi Fatuhada sai ba Palasiu Prezidente Republika Aitarak Laran, husi Palasiu PR ba Parlamentu Nasional, husi Parlamentu ba Jardim Herois Metinaro, fatin neebe atu halot ba mak maluk sira neebe hatene ona ita nia jardim Heroi Metinaro avo Mau-Huno nia kampa ho avo Xavier nia Kampa, no saudozu sei hatoba iha avo Mau-Huno ho avo Xavier nia klaran, iha jardim Heroi Metinaro,” dehan Sekretariu Estadu Veteranus.
Sekretariu Estadu hatete, desizaun nee foti husi Governu liu husi Ministru Kombatente Libertasaun Nasional (MKLN) nomos kooperasaun husi entidade relevante sira nia hanoin.
“Selebrasaun misa iha Katedral iha oras tuku 09.00 dader, loron Sesta Feira, depois de vizita ba institusaun relevante neebe hau temi ona nee mak foin mak ba misa,” katak nia.
Nia hatete, familia no membru Governu sira presta omenajen ba Saudozu too Kinta Feira, no tuir regra neebe iha ona nunee serimonia too prosesu misa no funebre bele lao ho diak no programa lao ho susesu.
“Horiseik kuaze loron tomak hahu husi tuku 1:30 instituisaun estadu neebe iha Dili laran, agora instituisaun husi Munisipiu sira ami sei orienta nunee lao tuir regra no displinar neebe ami hatoo ona,” katak nia.
Tuir informasaun katak prosesu funebre sei hein mos Primeiru Ministru Kay Rala Xanana Gusmão, ida nee los ka lae? hatan ba kestaun nee Sekretariu Estadu hatete, konaba prezensa Primeiru Ministru Kay Rala Xanana Gusmão nia seidauk bele hatete, tanba daudaun nee Primeiru Ministru atualmente vizita rai liur hela, tanba nee seidauk iha resposta klaru katak bele ou labele nia prezensa iha ka laiha nia labele fo imformasaun.
Entaun daudaun nee governu seidauk kontaktu ho Primeiru Ministru Kay Rala Xanana Gusmão kona-ba nia hanoin no prezensa ba halot Saudozu Francisco Guterres Lu Olo? hatan ba kestaun nee Sekretariu Estadu hatete, kona-ba assuntu ida nee nia labele fo komentariu maibe sei hein superior Ministru MKLN mak bele koalia kona-ba assuntu nee.
(eme)
