BAUCAU, STLTIMORLESTE.com – Sekretaria Estadu Igualidade (SEI) liu husi pontu fokal Munisipal disemina prevensaun violensia bazeia ba jeneru, ba membru FALINTIN – Forsa Defeza Timor Leste (F-FDTL) ho nia espoza sira iha Komponente Forsa Terreste (CFT – sigla português) Lanud Baucau.
Pontu fokal Sekretaria Estadu Igualidade (SEI), Domingas Soares Nunes aprezenta, objetivu husi diseminasaun refere atu habelar informasaun ba membru F-FDTL iha Komponente Terrestre Lanud Baucau kompostu feto no mane inklui nia espoza sira atu hamutuk halo prevensaun ba violensia neebe atualidade numeru kontinua sae makaas iha Munisipiu Baucau.
“Komesa husi 2023 too 2026, violensia domestika mak kazu neebe aas iha Munisipiu Baucau neebe rekolha husi PNTL. Hau seidauk hatene membru F-FDTL mos sai vitima ba violensia bazeia ba jeneru, mais hau espetativa ita prezisa habelar informasaun ba espoza F-FDTL nomos membru F-FDTL,” hateten Pontu fokal Sekretaria Estadu Igualidade (SEI), Domingas Soares Nunes ba jornalista sira hafoin remata sesaun abertura ba diseminasaun iha CFT Lanud Baucau, Segunda (08/06/2026).
Nia informa, iha tinan 2026 husi fulan Janeiru too Marsu, kazu violensia bazeia ba jeneru neebe parte SEI rekolha husi Komando Polisia Munisipiu Baucau hamutuk 29.
Domingas Soares Nunes konsidera, bainhira kazu la halo prevensaun bele fo risku ba vida umanu, hanesan fo impaktu ba rendimentu ekonomia familia, afeta ba oan sira idade kiik lakon direitu ba asesu edukasaun no halimar moe ho nia kolega sira.
“Kazu violensia neebe ita rejista fo afeta tebes ba ita nia rendimentu ekonomia familia, tanba familia neebe sai vitima no suspeitu aktu violensia nee sente moe ona atu ba halo atividade negosiante, halo atividade oin oin, entaun ida nee bele impaktu ba rendimentu ekonomia familia,” Domingas akresenta.
Pontu fokal nee komenta, parte SEI kontinua habelar informasaun liu husi diseminasaun ba parte hotu, nunee iha konhesimentu prevene kazu refere iha territoriu nasional, espesialmente iha Munisipiu Baucau.
Iha fatin hanesan, Maijor Francisco Pinto konsidera, diseminasaun refere importante tebes, tanba igualdade jeneru mak nuudar valor fundamental iha kualker instituisoens estadu neebe partisipa husi feto no mane hanesan iha Komponente Terrestre Lanud Baucau atu defende no servi estadu, garante pas no estabilidade.
“Formasaun igualdade jeneru nuudar oportunidade atu fortalese instituisaun estadu nian hanesan mos komponente terreste atu hadia no melhora servisu estadu nian efisiensia operasional respeitu mutu dignidade umana no valorizasaun kapasidade hotu neebe mak halao,” dehan nia.
Nia fundamenta, objetivu husi diseminasaun refere mos atu hasae konsiensia membru sira nian kona-ba importansia igualdade jeneru iha Komponente Terrestre Lanud Baucau hodi prevene servisu sira ho seguru no inkluzivel.
Tanba nee, agradese ba SEI bele halao diseminasaun iha CFT Lanud Baucau no husu ba membru F-FDTL no espoza sira atu seriu partisipa iha atividade refere, nunee bele kontribui ho kultura organisasional bazeia ba respeitu no profisionalizmu kontinua kapasita membru seluk hodi lori Komponente Terrestre Lanud Baucau nuudar ezemplu ba servisu nasaun nian.
Entretantu atividade diseminasaun husi SEI neebe realiza iha CFT Lanud Baucau hetan partisipasaun masimu husi membru F-FDTL inklui membru sira espoza.
(tom)
