DILI, STLTIMORLESTE.com – Terras Propriedade kuandu halo jestaun diak bele hatama reseitas ba Estadu, liu-liu mos husu rai sira neebe abandonadu.
Tuir Sekretariu Estadu Terras Propriedades, Jaime Xavier Lopez katak, ita hanoin deit ba mina no mina nee loron ida sei maran, halo jestaun diak ida liu husi Terras nee atu bele hatama reseitas ba Estadu.
“Ida mak rai neebe abandonadu populasaun Indonezia husik hela ita regulariza atu hatama reseitas balu husi nee, kuandu ita halo jestaun diak, hanesan mos ita atu fo sertifikadu ba ema uluk Indonezia no Portugues nian selu puramentu nee, kuandu halo jestaun diak sukat rai sira nee tenke selu atu hatama reseitas ba Estadu,” dehan Jaime ba jornalista sira iha Kaikoli, banhira ensera Formasaun, Kuarta (04/06/2025).
Nia hatutan, lei seidauk iha atu halo ida nee maibe komesa book ona, atu ema neebe faan rai no sosa rai tenke selu ba Estadu, halo ida nee atu ita nian reseitas bele aumenta labele hare husi mina deit, jestaun nee kuandu halo diak ita bele iha osan uitoan hodi asegura makina Estadu nee.
Dehan tan, agora notifikasaun lao hela, ezemplu hanesan rai iha Ministeriu Finansa nia sorin karuk no loos nee rai Ministeriu Finansa nian, iha tempu badak bele halo dezokupasaun iha neeba, maibe termus Terras nian sei bele konvoka reuniaun ruma, too ikus mai bele hasai.
Sublina, kona-ba Perunas Bairo Pite, Surikmas, Osindo 1, Osindo 2 no Delta 1 Delta 2 no mos Delta 3, sei lao ba iha neeba hotu tanba agora funsionariu sei menus hela.
Hatan kona-ba komunidade sira neebe okupa rai iha tempu Português no Indonezia nian, nia dehan, balu iha vontade rasik ba selu, maibe balu seidauk kumpri sira hakarak ita mak tun ba foti dadus ba sira. Maibe atu dehan deit katak, hela fatin neebe la halo kontratu arendamentu tuir lei nee ilegal hela, no too tempu ruma Governu presiza fatin neeba bele hasai deit.
Nunee lei neebe regula sira mak lei numeru 1/2003 no dekretu lei numeru 19 maka regula sira.
Iha fatin ketak, Akademiku UNTL, Sebastiao Dos Santos dehan, reguliza duni rai sira neebe abandonadu, hodi hatama reseitas ba Estadu.
“Hau hanoin presiza duni regulariza rai sira nee, tanba rai barak mak ema okupa deit, la kumpri sira nia dever,” dehan nia.
Hatutan tan, Terras Propriedade nia planu neebe diak, tanba iha lei mak haruka, atu ema hotu bele moris tuir dekretu neebe iha liu-liu ba sira neebe okupa rai no uma Estadu.
(ter)
