DILI, STLTIMORLESTE.com – Sekretaria Estadu ba Igualdade (SEI) hamutuk ho TAF-Nabilan realiza sorumutu prevensaun hodi haforsa ligasaun entre doador sira iha dialogu kritiku fo reforsa ba prevensaun primaria neebe efetivu bazeia ba evidensia hodi hapara violensia hasoru feto no labarik sira.
Iha biban nee Sekretaria Estadu ba Igualdade, Elvina Sousa Carvalho liu husi nia diskursu iha Timor Plaza; Kinta nee (05/06/2025) sente kontente tanba ema neebe luta ba igualdade jeneru neebe fo asistensia mos ba vitima sira hamutuk iha fatin ida nee, fiar katak ho enkontru nee bele lori esforsu koletivu fahe esperiensia nomos fo inspirasaun ba malu.
“SEI hamutuk ho Fundasaun AZIA iha programa Nabilan fo apoiu husi Governu Australia haksolok tebes ho eventu ohin, sorumutu ba prevensaun kona-ba pratika prevensaun primaria hapara violensia hasoru feto no labarik sira,” dehan Sekretaria Estadu.
Sekretaria Estadu ba Igualdade hatete, inisiativa ida nee atu haforsa liu tan servisu hamutuk iha assuntu prevensaun, Timor Leste esforsu makaas atu alkansa kongresu lubuk ida iha area oin-oin inklui fo importansia ba asuntu igualdade jeneru, hakbiit feto no kombate violensia hasoru feto no labarik feto.
“Governu Timor Leste dezenvolve no implementa tiha ona planu asaun nasional Violensia Bazeia ba Jeneru iha 2022,” katak nia.
Planu Asaun Nasional Violensia Bazeia ba Jeneru durasaun ba tinan 10, tanba rekonhese halo mudansa ba atitude iha pratika no norma sira neebe abut metin iha sosiedade.
Nunee mos adjuntu Embaixador Australia iha Timor Leste, Edward Wilkinson hatete, hanesan ema hotu hatene violensia hasoru feto no labarik liu liu mane sira neebe uza violensia iha familia laran.
“Hanesan ita hotu hatene violensia hasoru feto no labarik sira liu-liu mane sira neebe uza violensia iha familia laran, hanesan iha Global sira neebe akontese inklui mos Australia, iha Australia husi feto nain 2 husi nain 5 hetan ona violensia entre tinan 15, mane sira mak halo violensia fiziku no asediu seksual no violensia seksual no feto sira hetan posiblidade boot hetan violensia husi ema neebe sira konhese,” katak Adjuntu Embaxador.
Nunee mos Violensia Kontra Feto no Labarik Feto sai hanesan asuntu seriu iha Timor Leste. Tuir peskiza Nabilan nian, iha 59% Feto ho idade 15-49 envolve ona iha relasaun íntimu, hatete katak sira hetan violensia fizika ka violensia seksual ruma, ka forma violensia rua nee hotu, husi parseiru mane ida durante sira nia moris. Konsekuensia husi violensia kontra feto sira barak los liga ho saude, edukasaun, bem-estar no buat seluk tan.
Evidensia global hatudu katak bele prevene violensia kontra feto no labarik-feto. Prevene violensia signifika evita violensia molok akontese, ka hamenus ba futuru frekuensia ka gravidade husi violensia neebe akontese tiha ona. Maske servisu prevensaun lahanesan ho servisu responde (responde No. fo asistensiaba feto neebe esperiensia violensia, buat rua nee presiza lao hamutuk tanba interligadu.
Sekretaria Estadu ba Igualdade hanesan Instituisaun Estadu neebe haree ba iha asuntu promosaun igualdade jeneru no inkluzaun iha Timor Leste ninia papel no responsabilidade mak koordena no halo avokasia ba Abordajen Integrada Jeneru iha Politika, Lei, Programa No. Orsamentu Prevensaun no kombate Violensia Bazeia ba Jeneru Empoderamentu Ekonomiku Feto no Hasae partisipasaun feto iha vida polítika No. nivei foti-desizaun. Iha implementasaun programa hirak nee SEI iha kolaborasaun ho Instituisaun Publiku sira, parseiru dezenvolvimentu tantu nasional no internasional no ajensia ONU.
Sekretaria Estadu ba Igualdade hamutuk ho TAF-Nabilan sei realiza Sorumutu Prevensaun hodi haforsa ligasaun entre doador sira, Ajensia sira, Parseiru Dezenvolvimentu no tekniku sira iha dialogu kritiku kona-ba sira-nia papėl iha influensia pratika, no fo rekursu ba prevensaun primaria neebe efetivu, bazeia ba evidensía hodi hapara violensia hasoru feto no labarik sira.
(eme)
