DILI, STLTIMORLESTE.com – Governu liu husi Sekretariu Estadu Komunikasaun Sosial (SEKOMS) halao enkontru ho reprezentante media sira hodi diskute konaba dekretu lei neebe Konselhu Ministru aprova, hodi fo subvensaun ba orgaun komunikasaun sosial sira.
SEKOMS, Expedito Dias Ximenes esplika, objetivu husi enkontru nee mak diskute konaba dekretu lei neebe foin lalais Konselhu Ministru aprova atu fo subvensaun publika ba orgaun komunikasaun sosial.
“Tanba nee mak ohin hau enkontru ho media nain sira ho diretor sira media nian atu bele esplika konaba saida mak Konselhu Ministru iha Kuarta feira liu ba aprova, no objetivu governu nian saida, husi rejime subvensaun ba orgaun komunikasaun sosial, objetivu atu esplika ida nee,” hatete nia ba jornalista sira iha Palasiu Governu, Segunda (03/08/2026).
Governante nee afirma, iha enkontru nee hetan apresiasaun husi media nain sira, sira fo agradesimentu boot ba IX Governu Konstitusional neebe fo atensaun ba media sira nia difikuldade neebe durante nee media konvensional, plataforma privadu sira atravesa ho avansu teknolojia kompetisaun iha area teknolojia nee makaas, tanba plataforma barak mak mosu.
“Dala barak jornal sira hasoru difikuldade finanseiru no mos televizaun radio atravesa situasaun ida nee, entaun governu sente katak bele fo apoiu, tanba ita hotu hatene konstituisaun republika hatuur katak media hanesan pilar importante ba demokrasia, pilar importante ba konsolidasaun Estadu Diretu Demokratiku, tanba nee mak presiza fo apoiu,” dehan nia.
Nia sublina, maske governu fo apoiu ba media sira, maibe la signifika governu sei halo intervensaun ba media sira nia politika redasaun.
“Mezmu governu fo apoiu liu husi subvensaun publika, mais ida nee la signifika katak governu sei regula, governu sei la interven ba iha politika editorial media hotu-hotu nian, la interven sala redasaun media ida-idak nian, maibe Governu nafatin konsisten garante liberdade imprensa ho liberdade de espresaun,” dehan nia.
Governante nee husu ba media nain sira atu aprezenta sira nia planu no programa, nunee governu bele haree no governu bele tau osan ba iha Orsamentu Jeral Estadu (OJE) 2027.
Entretantu, antes nee iha loron Kuarta (29/07/2026) Konselhu Ministru aprova projetu Dekretu-Lei neebe aprezenta husi Sekretariu Estadu Komunikasaun Sosial, Expedito Dias Ximenes, kona-ba Rejime Subvensaun Publika ba orgaun komunikasaun sosial sira.
“Objetivu husi diploma ida nee atu hametin sustentabilidade ba setor nee, asegura sirkulasaun livre kona-ba informasaun, no mos promove pluralizmu no diversidade opiniaun sira,” haktuir nota komunikadu neebe STL asesu husi governu.
(alb)
