DILI, STLTIMORLESTE.com – Relasiona ho selebra loron semana Mundial Oseanu tinan 2025, neebe hahu karavana lao ain husi Ministeriu Negosiu Estranjeiru no Kooperasaun (MNEK) too iha Portu Dili, Prezidente Republika halo abertura hodi hatete katak atividade nee importante hodi eduka povu, joven no labarik sira hadomi natureza.
“Loron ohin nee loron boot, loron diak joven sira no komunidade sira hotu kria atividade hatudu vizaun diak, hatudu domin ba tasi ba natureza, hau espera loron ohin ita la haluhan aban semana mai nee la haluha, ohin laos eventu ida deit, tinan-tinan ita halo nee para eduka ita, eduka povu, joven sira, labarik sira para hadomi natureza tomak,” dehan Prezidente Republika, Jose Ramos Horta iha abertura ba selebrasaun loron Mundial Oseanu, iha MNEK, Sabadu nee (07/06/2025).
PR dehan, hadomi tasi no tenke hadomi mos rai, labele soe lixu arbiru iha mota laran, labele soe lixu arbiru iha estrada, labele tesi ai arbiru, labele oho manu oan sira iha ai laran no husu labarik sira soe tiha imi nia fiska, soe imi nia kilat neebe tiru manu sira iha ai-laran nee, labele kaer meda atu faan no animal sira hanesan loriku kakatua, ita tenke iha uma kuda ai, kuda ai fuan, kuda modo, iha eskola diretor sira tenke hatudu inisiativa, buka kuda ai, aifunan, modo no aifuan, nee mak mensajen ba meiu ambiente ba natureza.
Tanba ita hadomi tasi, entaun labele soe lixu iha mota laran, tanba mota tun lixu hotu-hotu tama ba tasi, oho ikan sira, tinan ruma liu tan la iha tan koral sira, la iha animal sira iha tasi.
Sublina, Timor riku boot tebes ba diversidade maritima ka marinha, ita iha ikan kualidade lubuk ida, koral atus ba atus se ita la tau matan loron ruma mate sei mohu. Sira mate vida iha tasi la iha, ikan mos la iha sira neebe depende ba peska, sira sei la iha tan hahan ona.
“Atividade nee ita agradese ba Governu no agradese ba Prezidente Komisaun ba inisiatva ida nee, atu ohin ita selebra tasi, ita hateke ba tasi haree tasi nee kapas, bonitu tebes, loron-loron haree. No husi foho ita haree ita nia istoria mai husi tasi, mai husi 40 mil anos liu ba, kuandu povu ema balu husi Malazia husi Xina sira tun mai iha nee hahu konforme arkiologu sira hateten, 40 ka 50 mil anos ema komesa mai husi tasi mai iha nee,” kata PR Horta.
Tuir observasaun STL nian, atividade nee partisipa husi Primeiru Ministru, membru Governu balu, inklui grupu sira neebe hatudu Karavana, husi eskola sira, ministeriu balu inklui mos husi munisipiu.
(ter)
