DILI, STLTIMORLESTE.com – Ministeriu Interior (MI) liu husi Servisu Migrasaun iha loron Tersa nee ofisalmente halo auto entrega fuzitivu nain 2 ho inisial ZX no NB ba Interpol Repulika Popular Xina, tanba envolve iha krime fraude fiskal no prostituisaun organizadu.
Entretantu suspeitu ZX tama lista Interpol tanba envolve iha fraude no korupsaun, enkuantu NB envolve aan hodi organiza no responsabiliza ba atividade prostituisaun. Tanba atividade kriminál nee suspeitu nain rua identifikadu hanesan kriminozu nivel aas neebe tama iha lista mean husi Interpol Beijing nian, nunee autoridade kompetente halo kolaborasaun internasional atu lokaliza no prende suspeitu sira hodi lori sira ba prosesu legal tuir lei.
Diretór Ezekutivu Servisu Migrasaun, Komisáriu Asistente Polísia Jorge Monteiro, hamutuk ho Diretóres Jerál, Diretóres Nasional nomos Xefe Gabinete halo kedas auto entrega transferensia ba Interpol Beijing nian nu’udar parte husi kooperasaun membru Interpol atu garante prosesu legal no hasae kooperasaun internasional iha kombate krime transnasionál.
Nia afirma, hafoin ekipa Interpol ho Servisu Migrasaun konklui prosesu tomak iha sede sentral Servisu Migrasaun Vila Verde, autoridade nasaun rua nee lori kedas fuzitivu sira neebe suspeita envolve iha kazu krime burla internasional ba sae aviaun Aero Dili iha Aeroportu Internasionál Nicolau Lobato, Díli, hodi fila ba nasaun orijen iha Xina.
(jen)
