DILI, STLTIMORLESTE.com — Servisu Saúde Munisípiu Dili (SSMD) rejistu kazu ISPA hamutuk 65.754 durante trimestre datoluk tinan 2026.
Diretór Servisu Saúde Munisípiu Dili, Mateus Pinto hateten, kazu sira-ne’e rejistadu durante fulan Jullu to’o Setembru 2026.
“Kazu ISPA hamutuk 65.754, inklui Sentru Saúde Comoro 32.563, Bekora 13.400, Vera-Kruz 8.352, Metinaru 6.201 no Formoza 5.238,” hatete Mateus Pinto.
Nia hateten, SSMD rejista mós moras seluk, hanesan diarrea, pneumonia no moras seluk. Maibé, kazu ISPA kontinua aas kada tinan.
Mateus esplika, mudansa klimatika no kondisaun ambientál bele kontribui ba aumentu kazu ISPA iha komunidade, liu-liu bainhira ema hasoru sintoma respiratóriu.
“ISPA agora mosu liu iha Dili, ho sintoma hanesan mear, inus been no inus kustupadu, ne’ebé liga ho kondisaun ambientál no klima muda,” nia esplika.
Nia dehan, SSMD kontinua halo sosializasaun ba komunidade kona-ba prevensaun, inklui uza máskara iha fatin públiku no fatin ho ema barak.
“Ita sujere komunidade uza máskara iha transporte públiku no fatin ema barak halibur atu prevene transmisaun moras,” nia deklara.
Mateus husu komunidade atu kumpre medida prevensaun no ba sentru saúde bainhira iha sintoma respiratóriu la’ós normal.
“Se iha sintoma la’ós normal, komunidade tenke ba kedas sentru saúde atu halo konsulta no prevene propagasaun moras,” nia informa.
Nunee mos Xefe Suku Comoro, Eligio José Marçal hateten, prevensaun ISPA mós presiza limpeza ambiente, tanba ambiente fo’er bele aumenta risku moras respiratóriu.
“Ami sempre aviza komunidade atu hamos uma oin no ambiente, atu prevene moras ISPA,” nia informa.
Enkuantu, pasiente Olinda da Costa hateten, nia konsulta iha Sentru Saúde Comoro tanba sofre sintomas hanesan ulun moras, inus metin no mear durante semana ida.
“Ha’u moras ISPA durante semana ida, tanba ne’e ohin mai Sentru Saúde Comoro atu halo konsulta,” nia afirma.
(jen)
