DILI, STLTIMORLESTE.com – Instituto Ciências da Saúde (ICS) submete ona relatóriu kona-ba ezekusaun subvensaun públika faze primeiru, ho valór 50%, ba Ministériu Ensinu Superior, Siénsia no Kultura (MESSK), no agora hein atribuisaun subensaun públika pursentu 50 ba faze daruak.
Reitór ICS, Leão Borges hatete ba STL, Tersa (01/09/2026), katak relatóriu subensaun públika ba faze primeiru ho pursentu 50 submete ona ba MESSK iha semana kotuk.
“Relatóriu subensaun públika ba faze primeiru pursentu 50 submete ona ba MESSK. Semana kotuk mak ami foin submete relatóriu ba faze primeiru. Ezekusaun pursentu 50 ne’e mak sosa ekipamentu prátika ba estudantes sira no halo sosializasaun. Enkuantu subensaun públika pursentu 50 ba faze daruak, seidauk sai,” nia dehan.
Leão Borges hatete, maske relatóriu kona-ba faze primeiru submete ona, osan ba faze daruak husi MESSK seidauk atribui ba instituisaun ensinu superior sira, tanba prosesu sei lao hela.
“Ami seidauk hetan informasaun bainhira osan sei atribui, tanba ida ne’e kompeténsia ministériu. Ami hein deit. Bainhira atribui ona mai, ami bele hahú fali ezekusaun tuir ami nia planu ne’ebé iha ona,” nia informa.
Enkuantu ne’e, Reitór Instituto Superior Cristal (ISC), Sebastião Pereira, hatete katak subensaun públika ne’ebé MESSK fó ba instituisaun ensinu superior sira tenke ezekuta tuir nesesidade kada instituisaun.
“Hau hanoin katak subensaun públika ne’ebé MESSK fó apoiu ba universidade sira, kada instituisaun ezekuta tuir nia nesesidade. Bainhira ezekusaun hotu, presiza halo relatóriu no hatama ba MESSK,” nia esplika.
Iha parte seluk, Diretór Jerál Ensinu Superior no Siénsia, Domingos Barros, hatete katak kona-ba subensaun públika ne’ebé MESSK fó ba instituisaun ensinu superior sira, balun ezekuta ona no relatóriu mos hatama ona ba ministériu.
Nia hatete katak, atu hetan informasaun kle’an liu kona-ba ezekusaun subensaun no relatóriu, presiza koordena ho parte finansas, tanba parte ne’e mak simu relatóriu husi instituisaun ensinu superior sira.
“Kona-ba subensaun públika ne’ebé ita fó ona ba ensinu superior sira, depois sira nia relatóriu ne’e husu ba parte finansas, tanba sira mak simu relatóriu. Ita nia liña koordenasaun servisu ho ensinu superior sira lao diak, tanba sira sai parseria diak ho Ministériu Ensinu Superior. Iha asuntu ruma, nafatin hato’o ba malu,” afirma Domingos ba STL, Kinta (27/08/2026).
Domingos Barros hatutan katak, liña koordenasaun entre MESSK no instituisaun ensinu superior sira lao diak nafatin, tanba instituisaun sira ne’e sai parseria estratéjika ba dezenvolvimentu ensinu superior iha Timor-Leste.
Kooperasaun no partilla informasaun entre MESSK no instituisaun ensinu superior sira kontinua hala’o, ho objetivu atu hadi’a servisu no dezenvolve setor ensinu superior iha Timor-Leste.
(jac)
